Aizawl: Fisheries Minister K.Lalrinliana chuan, "Sangha chi leh a chaw a kan intodelh theih nan Mizoram sawrkarin hma a la mek a ni," a ti.

Nimin khan Fisheries Minister K.Lalrinliana hian ‘Little Galilee’, Zero Point, Bairabi road a Carp Hatchery Unit (Sangha tui awp keuna) a sangha chi tihkeu hmasak ber a en a, ram pawn atanga sangha chi lak luh ngai lo va, sangha chi leh a chaw a kan ram kan intodelh theih nana hmalakna pawimawh tak a nih thu a sawi. Minister chuan Covid-19 avangin bungraw hrang hrang ram pawn atanga lak luh a harsat thu sawiin chung zingah chuan sangha chi lak luh kawngah pawh harsatna a awm thu a sawi a. Hemi avang hian sangha chi leh a chaw a kan intodelh theih nan sawrkarin hma a lak mek thu a sawi a. "Little Galilee a Crap Hatchery Unit pawh sangha chi a kan intodelh theih nan kan chhawr tangkai chho tan dawn niin a lang a, a hmasa ber atan sangha chi nuai 10 bawr vel tihkeu a ni a, heng sangha chi te hi thla 3 hnuah chuan hralh chhuah theih tur a beisei a ni,” a ti.

Fisheries Department kaltlanga Blue Revolution hnuaia Carp Hatchery unit tangkai taka hmangtu, Little Galilee neitute taimakna leh inpekna chu fakawm a tih thu sawiin Mizorama sangha chi a kan intodelh theihna kawng sialtu pawimawh tak a nih ngei a beisei thu a sawi bawk a ni.

Minister chuan sangha chi a kan intodelh theih nana Fisheries Department hmalakna sawiin, “Little Galilee Hatchery Unit bakah hian Lengpui, Tam dil leh Zobawk-ah sangha chi tihkeuna hmun ruahman a ni a. Heng hmun atangte hian hlawhtling takin sangha chi kan tikeu thei a nih chuan intodelhna kawnga hmasawnna ropui tak a ni dawn a ni,” a ti bawk. Minister chuan sawrkai laipui ruahmanna thar, Pradhan Mantri Matsya Sampada Yojana (PMMSY) chu sangha hmanga eizawngtute dawmkan nan leh sangha a kan intodelh theih nan Mizoramah pawh tangkai tak a hman a nih thuai beisei a nih thu a sawi.

Little Galilee, Zero point, Bairabi road a Carp hatchery (Sangha tui awp keuna) hi April 2019 khan Blue Revolution hnuaia bul tan a ni a. July thla tir khan Katla, Rohu leh Grass carp sangha chi hi, a vawi khatna atan nuai 10 vel tihkeu niin, September thla ah hralh chhuah theih tur a beisei a ni a, kumin vek hian sangha chi tikeu leh hman tur a hmalak mek a ni.