Aizawl: Nimin khan Tuipui tlawhchhhan Joint YMA buatsaihin Tuipui lui kam, Khawbung PHE Pump House ah kum 2019 chhunga Tuipui tlawhchhan Joint YMA sangha fuan ven kharna inkhawm buatsaih a ni a, Fisheries Department Minister K. Lalrinliana'na hmanpui.

Fisheries Department Minister chuan sawrkarin lui dung nungcha humhalh tura ngaihtuahna a sen nasat thu sawiin, dan thar "The Mizoram Fisheries Conservation Rewards Scheme, 2019" pawh reilote ah hman theih beisei a ni tih a sawi a. "He dan hnuaiah hian dan phalloh a luidung nungcha suat thin te hremna, luidung nungcha humhalh tura thawk nasa te lawmman/tanpuina pek dan tur te ruahman a ni a, thuneitute hnena dan bawhchhetu te hriattir tu te lawmman tur te, phalna (license) nei te chauhin fee chawi a dan hnuaia luidung nungcha an man theihna tur te leh thil pawimawh dang tam tak dan tharah hian a awm dawn a ni," a ti.

Minister hian Tuipui tlawhchhhan Joint YMA hnenah an mamawh huna an hman atan tangka fai Rs 15000 a hlan a, sangha veng tha branch YMA te lawmman tur a tum bawk a ni.

Tuipui tlawhchhan Joint YMA hi kum 2007 khan din a ni a, a huam chhungah hian YMA Branch 13 awmin YMA branch hrang hrang hian Tuipui lui dung tluanin chan an in sem a, kum tluanin sangha an humhalh a, kawng hrang hrangin sangha humhalh chungchang zirtirna an in pe thin a, sangha fuan hun a zirin October-November thla hian an veng ngawrh bik thin a ni.

Sangha fuan an humhalhna ni Khawbung pump house bul Tuipui lui kilometre khat vel a thui huam chin ah a ni a, hemi huam chhungah hi chuan kum tluanin sangha leh luidung nungcha khawih/man phal loh a ni a, hemi chin bakah hi chuan len kua kutzungchal tiat ai a zim lo (number 25 chung lam) hmang a man phal a ni a, bomb, electric current, tur, chinai, dynamo etc hmanga luidung nungcha man hi khap bur a ni.