Aizawl May 18, 2024 : Khawzawl atanga National Highway (NH) - 06 pawhtu kawngpui, Sapsakei Lamlian (Loch Road) laih mek leivungin kawngpui a hnawh pin avanga khawchhak tlangdung zin veivak te'n harsatna an tawh chungchangah vawiin khan Champhai District Bawrhsap James Lalrinchhana leh Khawzawl District Bawrhsap K. Lalrohlua te chuan National Highways & Infrastructure Development Corporation Limited (NHIDCL) leh kawngpui siamtu leh enkawl mektu Shri Balaji Construction Company (SBCC) hotute an ko.

Champhai DC hian DC Bungalow, Keifangtlang-ah NHIDCL leh SBCC te hi a ki a, harsatna chinfel dan tur a sawipui. Khawzawl DC hian NHIDCL leh kawngpui enkawltu, Shri Balaji Construction Company (SBCC) aiawh te hi a ko bawk a. SBCC ah hian thutlukna siam thei he laiah an awm loh avangin, Executive Director, NHIDCL hnenah a tul anga hma rawn la turin lehkha a ziak a ni.

Khawzawl Bawrhsap hmalaknain Company lam hian he laia hnathawk turin JCB pakhat an rawn tir a, hna a tan nghal a ni. Amaherawhchu, Bawrhsap hian kawng siam a, leivung paih fai bawk tur chuan Hitachi 2 leh JCB 1 a ngaih thu NHIDCL leh Contractor te hi a hrilh.

Champhai District Bawrhsap James Lalrinchhana chuan harsatna thlenna hmun chu District dang ni mah se, Champhai District a nghawng tel avangin harsatna chinfel thuai dan tur ngaihtuaha inrawnkhawmna neih a nih thu a sawi a. Mipuite'n harsatna an tawh loh nana hmalak chu ngaihpawimawh a nih thu a sawi bawk.

Champhai District Bawrhsap chuan Shri Balaji Construction Company (SBCCC) thuneitu sang zawk pawh phone hmanga biain harsatna chinfel dan tur a sawipui a. Khawzawl District Bawrhsap K. Lalrohlua nen pawh inberawntlang zelin ruahmanna an siam dun a, Khawzawl Vengthar Joint NGO leh VC te pawh Khawzawl DC in ruahmanna siamte a hrilhfiah nghal bawk a ni.

Ruahmanna siam ang chuan Shri Balaji Construction Company (SBCC) in karleh Thawhtanni atanga kawng lai tan nghal thei turin Excavator/Hitachi an thawh chhuah pui ang a, Operator an neih remchan mai loh avangin Khawzawl DC in Operator a ngaihtuah sak dawn a, leivung paihna tur pawh Khawzawl DC in a ruahman fel tawh a ni. Leivungin kawng a tihpin chu a rang thei ang bera paih faia hawn a ni ang a, karleh Thawhtanni atangin Sapsakei Lamlian (Loch Road) sial that hna chu tunhma a kal dan zulzuiin chak zawka siam a ni dawn a. Kawng laih chhunga kawng hawn leh khar hun tur atan rawtna pawh siam a ni bawk.

Sapsakei Lamlian (Loch Road) hi Mizoram khawchhak lama lamlian upa ber a ni a. Aizawl khawpui duangtu British Army Officer, Lt Col G H Loch-a’n Aizawl - Tuisenhnar (Khawzawl) - Champhai - Falam (Myanmar) inkal pawhna tura a siam a ni. Khawzawl Vengthar atanga kawng kal hi NH-06 an laihna lamah Contractor te hian an tichhia a. Kum hnih liamta atang khan siam tha tura vawi tam ngen an nih hnuah pawh chhuanlam eng eng emaw an nei zel a, Khawzawl Vengthar khawtlangin he kawng siam hnatlang hi an nei ta a ni.