ZALEN July 11, 2025 : Horticulture Department chuan 10.7.2025 (Ningani) khan Pehlawn YMA Run ah Director of Horticulture C.H. Lalmuanpuia hoin Sapthei chin khuh hawnna hun an hmang. He scheme hi MIDH Special Intervention hnuaia hmalakna a ni.

 He hunah hian Horticulture Department a mithiamte leh Pehlawn leh a chheh vel a Sapthei ching tura thlante nen hun hman ho a ni a, heng Sapthei ching tura thlan bikte hi Horticulture Department atangin tanpuina chi hrang hrang Sapthei tiak, Sapthei zamna hrui, Organic leitha, NPK, a zamna tur banril, a natna enkawlna damdawi, wood vinegar, a kahna (Sprayer), a tang tanna (secateur) te pek an ni dawn a. A phun leh a thlawhfai leh a enkawl chu a chingtute thawh tur a ni.

Horticulture Director C.H. Lalmuanpuia chuan, "India state dangte neih ve loh, kan ram a tha duh si Sapthei ah hian hma nasa taka lak chhoh kan tum a, he programme hi lian zawkin Sapthei that duhna district thlan bik Khawzawl leh Champhai district lamah te la kalpui zel tur a ni a, hnathawk peih chuan min cho rawh u, Horticulture Department chu kan awm zel ang. Department in a tih tur a rawn ti zel ang a, in tih tur thahnemngai takin lo ti zel ula, chutichuan kan ramin hma a sawn zel ang. Chalfilh tlang dung hi Sapthei hmunah i siam ang u. A dah that dan tur leh processing te pawh sawrkar in a tih dan tur a ngaihtuah mek zel a, kut hnathawktute chawikanna tur atan hma kan la mek zel a ni," a ti.

Zawhna leh chhanna hun hman a ni a, a hmunah hian Sapthei chingtute tana scheme ken telte semchhuah nghal a ni. Pehlawn khaw daia Sapthei chinna tur hmun thenkhat lo buatsaihte enkual a ni a, Sapthei chingtute pawh an phur tlang hle a ni.