Aizawl; Tunlai hian misual thenkhat chuan tawngkam zahmawh leh saruak thlalak hmanga mi dangte vau a, sum dil in an pek loh chuan tihdarhah an vau thin a. Mizoram Police chuan hetiang mi sual laka fimkhur turin mi tinte an ngen. 

ZALEN-in Cyber Crime Police thawktute hnen atanga thu a dawn danin mi sual thenkhat chuan hmeichhe itawm tak anga inlanin mipa thenkhat chu Instagram, WhatsApp, Facebook leh social media platform hrang hrangah thiana siamin an saruak thlak leh video-te an thawn a. Heng mite hian saruaka awm ve tur ten an ti a, chutia an han awm chiah chuan a ruka video hmanga thla lo lain a hnuah an thlalak mawi lo tak chu pawisa an pek loh chuan thehdarhah an vau ta thin niin an sawi.

Cyber Crime Police chuan mi sualte hian thlalak leh video an laksakte hi pawisa pe turin an ti a, pawisa an pek loh chuan an thlalak leh video-te chu thehdarhah an vau bawk a. Hetia anmahniin pawisa an thin chhuah theih loh chuan khawi state-a Cyber Crime Police ang emawa insawiin an umzui thin niin an sawi.

Mi sualte hian a tlangpuiin kar hnih vel bak an umzui peih lo a, hemi hnu hi chuan an tawpsan ve mai nia sawiin video pawh hi an thehdarh lem lo nia an hriat thu an sawi.

Mizoram Cyber Crime Police thawktute chuan heng an bum zing ah hian kohhran hruaitu leh officer lian tak takte pawh an awm tih sawiin an hnena in-report lo pawh mi eng emaw zat an awm nia an hriat thu an sawi a. Mi thenkhat chuan pawisate pawh thawnin sing chuang fe thawnte pawh an awm tih an sawi bawk.

Hetiang inbumna hi kum 2020 vel atanga bultan nia sawiin Cyber Crime Police chuan tun hnaiaha hluar chho leh niin an sawi a. Mi sualte hi man chhuah an har tih sawi bawkin, “Tunlaiah chuan sim card hi bank account ang tluk a ni a, Paytm, Google Pay leh thil dang hmangin pawisa inthawn zung zung theih a ni a. Mi sualte hian state hrang hrang atangin sim card hi an lei khawm a, kar khat vel bak hmang lovin an paih nghal zel a, evidence ber an paih nghal zel avang hian chhuichhuah an har hle a ni,” an ti.

Bank account hmanga mi sualte chu manchhuah an har tih sawi bawkin, “Account pakhata lut hi minute reilo te chhungin account dang eng emaw zatah thun chhawn (tranfer) nghal zel a ni a, chhui sen a ni lo a ni,” an ti bawk. 

Mi sualte hi intiamruala thil ti thin nia an lan thu sawiin Rajasthan, Maharastra, West Bengal leh state hrang hrangah te an inzarpharh nia an hriat thu an sawi bawk.