Aizawl May 8, 2024 : Leader of Oposition Lalchhandama Ralte chuan Ni 3.5.2024-a CM zahawm tak Lalduhoma’n Press Conference a neih tum khan mipui hriatah thu dik lo chiang tak a sawi avangin MNF Legislature Party leh MNF Party chuan thudik puan chhuah ngei tul an ti a, SASCI sum lapse chhan chu MNF sawrkar ni lovin ZPM sawrkar a ni a ti.

Lalchhandama Ralte chuan, "MNF sawrkar lai ni 6.9.2023 ah kum 2023-24 atan SASCI Part - I sum hi Nuai 46,255 dawngin, ni 2.2.2024 ah Cheng nuai 414 Mizoram Finance Deptt in a dawng a, chuta tang chuan Rs 20,000 lakh chu MNF sawrkar in a hnathawktu Implementing Deptt ah a released nghal a. A bang Nuai 26,669 chu Model Code of Conduct a lo awm zui tak avangin Finance Deptt in a kawl zui ta a ni. Tichuan December thla tirah ZPM Sawrkar thar a lo piang a, sawrkar hmasain dan ang thlapa PWD registered Contractor a lo ruatte chu hnathawk hlei thei lovin an siam a. SASCI Guidelines leh sanction Terms & Conditions ah State Finance Deptt-in ni 10 chhunga sum hi Implementing Deptt kuta pek chhuah tur a tih laiin, ZPM sawrkar chuan 1st instalment sum Nuai 26,669 hi kum 2023-24 Financial Year a liam a ni, ni 31.3.2024 ah pawh release lovin a la kawl tang lui tlat a ni. He tia 1st Instalment ber pawh ZPM sorkarin an release duh loh avang hian 2nd instalment tura sanctioned thlap tawh Nuai 23,331 chu a lapse ta vek a ni," a ti.

MNF Lagislature Party Leader chuan, "CM zahawm tak Lalduhoma’n MNF sawrkar lai, kum 2022-23 a SASCI Part-I sum Cheng nuai 20000 lapse anga a sawi kha thu dik lo a ni a. Hemi kum hian Mizoram tan Cheng nuai 40000 sanctioned a ni a, Cheng nuai 40000 lakh man hna chu tender vek niin Contractors ten hna pawh tha takin an thawk a. Kha Financial Year chhung khan 2nd instalment kha lo chhuak hman lo mah se, a taka hnathawh vek a nih avangin Cheng nuai 20000 lakh chu a kum lehah a hma kuma Unpaid Bills pek nan Central sawrkar Finance Ministry chuan a rawn released full leh vek a ni," a ti.

Kum 2022-23 a Rs 40000 lakh chu a kimin Mizoramin a hmu a, sum lapse pakhatmah a awm loh avangin hnathawh bill zawng zawng pe tur pawhin MNF sawrkar khan harsatna a nei lo,. Projects tha taka thawh vek a ni, an ti.

MNF Legislature Party Leader chuan Kum 2023-24 ah Central sorkar Finance Ministry chuan Mizoram tan SASCI Part-I hnuaiah Cheng nuai 50,000 allocation a pe leh a. Unpaid bills pek tlak nan Cheng nuai 20000 additional a sanction tel bawk. Cheng nuai 20000 hi kha tih laia CM zahawm takin a bika a dil leh Union Finance Minister hmaichhana a sawpui anga rawn pek belh a ni a, sum a lapse ta lo a ni, an ti.

MNF chuan, "Cheng Nuai 23,331 lapse hi a tam tham a, veng leh khaw tam takin an tuar dawn a, he sum atanga hmasawnna ruhrel rotling tam tak siama chumi paha GST leh Labour cess atanga cheng nuai sang bi sawrkarin a chang tur chu khatih laia MNF sawrkar leh Central sawrkar duh dan leh sanction dan a nih laia sorkar tharin a ti lapse vek mai hi MNF Legislature party chuan pawi an ti a. A mawhphurtu Chief Minister & Finance Minister Lalduhoma hian mipuiah ngaihdam a dil ngei ngei turah an ngaih thu an sawi.