ZALEN April 16, 2026: MNF General Headquarters-a Publicity Board chuan tukin khan ZPM sawrkarin SASCI sum a tih lapse-na Bethlehem Vengthlang Hall sakna tur cheng nuai 323 lapse-na leh Ramthar veng Multipurpose Community Centre sakna tur cheng nuai 144 a tih lapse-na hmun chu MNF Block leh Unit hotute hruaiin an tlawh.

VL. Krosshnehzova, Secretary, MNF Publicity Board & General Secretary, GHQ chuan, "Cheng nuai singthum chuang (nuai 32800) hmanga hnathawh tur kal mekah nuai sing chuang (nuai 11152) chu hman tur awm lovin a lapse a. Heti zat kan ram rohlu siamna tur tihbo nia, a mualliam mai hi a pawi takzet a. Hmun hrang hranga hmasawnna thlentu turin anih tur ang a thleng pha dawn ta lo hi a uiawmin, ZPM sawrkar sum enkawl thiamloh leh inthlahdah rah kan tel chho zel hi a pawi takzet a ni. Hmasawnna thlenna hmun veng mipui beisei ang thleng phalo tur hi a pawi kan tiin, a ngaihna hre lo ZPM sawrkar hi MNF chuan kan dem takzet a ni," a ti.

MNF General Secretary chuan, "A thawktu tur hriat sa (Restricted Tender) hmanga hna thawh SASCI 2025-26 Part I hnuaiah hian hna 41 zet thawh tura ruahman a ni a, hlawm lian thama duhsak zawngte Blanket Approval hmanga hna pek a ni. Sum ruahman atanga 34% hi Second installment a lokal tur mualliam ta chu a ni. Heng zingah hna 15 te hi Aizawl Municipal Area ami niin, heng hna 15 atang hian sum cheng nuai 1990/- lai chu a tham ral dawn a, Aizawl mipui tana channa nasa tak a ni a, sum enkawl kawnga ZPM sawrkar kal dan chu sawrkar tura an insawi dan nen inpersan tak a ni," a ti bawk.

First Installment 66% hmanna Utilisation Certificate pek mumalloh avanga heng sumte hi bothlau a ni a, tih tur tih mumalloh avanga hetiang hi thleng nawn tawh lo se kan duh takzet a ni. An sawrkar hmaa hre ber anga sawrkar hmasa thiltih an sawi zar zar laiin, a tak taka hnathawh kawnga a thlangtu mipuite beisei an phak lohzia a lo lang ta a ni, thlan lal fuhloh ten an duh duha an chinleh tur AMC-a ZPM candidate-te hi mifel tak tak mah nise, thlanchhuah chi an nih lohzia a chiang telh telh a ti bawk.