ZALEN February 14, 2025 : MNF President Zoramthanga chuan ZPM sawrkar chu SASCI sum cheng Vaibelchhe 200 rulh ngai dinhmuna ding mek a ni a ti a, Lengpui Airport hralh an tum chu anmahni vuat letna tura ruahmanna an insiam niin a sawi.

Vawiina Hnam Run chhung inkhawma thu a sawinaah Zoramthanga chuan, "SASCI sum vaibelchhe 200 chu 2nd installment project details fel tak siam niin, Tender pawh tih fel hman vek a ni. Contractor pawh thlan vek tawh niin, midang contact security deposit nen lam a tihfel tawh leh then khat chuan an thawk zo tawh nghe nghe a, sum pawh pek chhuah tawh anih lai a, thawh hmabak la awm insem hial duhna ZPM sawrkarin an nei chu a tha lo hle a ni. SASCI sum vaibelchhe 200 rulh ngai dinhmun ah ZPM sawrkar chu a ding mek a ni," a ti.

Lengpui Airport chungchang sawiin MNF President chuan, 'Airport chu an hralh miah lo ang,' tiin, "ZPM-in Airport hralh an tum hi anmahni vuak letna tur ruahmanna an insiam zawk a ni. ZPM sawrkar chuan ZMC hralh an tum tawh bawk a, inzir tum lovin an thawm ti ring em em ringawt mai a, William Shakespeare an 'Full of sound and fury, signifying nothing' a tih ang chauh an ni," a ti.

VC leh LC inthlan chuangchang sawiin, "MNF sawrkar tirh kum 2020 khan VC ah 63% leh LC ah 85% an tlin thu sawiin, ZPM sawrkar tirh ah erawh VC ah 48% leh LC ah 53% chauh an tling thu a sawi. Lunglei ah pawh LC ah 33% chauh ZPM chu an tling a ni. "Cabinet ah pawh sawihona awm miah lova, VC inthlan sawn hma hi tu tih nge tiin an la inzawt ngei ang", Pawl te reuh tete a dictatorial power hmang thin khan Sawrkar ah a hmang ta zel em ni, VC/LC inthlan rawn zikchhuah dana Chief Minister dictatorial power hi awmzel tur atan a tha lo hle a ni," MNF president chuan a ti.