SAWHKHAWK of the day Tun hnaiah kan ramah tul lo taka mi thlalak thehdarh avangin miin mualphona an tawk leh ta a. A kimchang chu hre ve lo mah ila social media kan hman thiam tawk lohzia a lang leh ta niin ka hria. Tunlaiah thil a awlsam tawh a, mi tin kan fimkhur a ngai, kan thlalak leh video, mi hmuh atana kan duh vak loh pawh hi engtin tin emaw a lo darh thei tih hriata fimkhur hi a pawimawh. Chutih laiin mi duh loh tih hriat reng lo thehdarh pawh hi dan hmaah thiam loh channa a ni a, miin kan thehdarh chu an lo lawm viau pawh a ni thei a, kan thehdarhsaka laka phuba kan lakna pawh a ni thei; mahse, mahni mawnghlim kan nihna chen a awm ve tho tih kan hriata kan tih loh hi a tha a ni. - Ama Kar hmasa in article chhuaha US President thlan dan in rawn ziah chuan beng a tivar hle mai. Ni tin chanchinbu leh chanchin tharah kan lo hre ve nasa si a, kan ngaihsante awmna ram a lo ni bawk a, ngaihven pawh a awl a. Chutih laiin an inthlan dan mumal hi hriat a harsa a, saptawng lah kan hre thiam ve mang bawk si lo, ka var phah uarh mai. Ka lawm hle a ni. - MkSiama Zalen chanchinbu hi hun rei tak atang khan ka lo la ve a. A thute hi a puitlingin a manhla hle thin avangin ka zawngchhang a ni ber mai. Mahse maw, Mizo tawng grammar leh conjunction hi tun aia uluk deuh chuan a tih theih ka beisei a. Rawn uluk deuh teh u, a lawmawm ngawt ang. Zalen chanchinbu dam reng rawh se. - L.Chhangte Krismas bazar chungchang leh thil man tihto vel kha ka lo chhiar ve a, tha ka ti hle mai. Kan sumdawngte hian tun kan hunpui lo thleng tur pual hian a man an titlawm thei lo a nih pawhin tito lo tal sela a va tha dawn em! Keini mi rethei tan bazar a hahthlak a, hunpui hi a huphurhawm phah thin em mai. Hnam dangte anga an titlawm thei em lo a nih pawhin tihto phah kher lo hlauh sela tih hi kan duhthusam a ni e. - Sylvia Central YMA hmalaknaa gas a ziaawm leh tan chu a lawmawm hle mai. Keini ang mi harsa deuh tan hian a lawmawm dan hi a zual bik hian ka hria, YMA hi vul reng rawh se. - Zuala Kan ram kawngpui khawilai mai pawh hi a chhia a ni mai lo maw? A va han hahthlak em em ve! Khawpui chhung kawng hi chu a zia viau chuan a lang a; mahse, dai hi a ngaihna a awm lo. Kawngpui lun ber atanga a lun lo ber pawl thleng mai hian lirthei nawr inring ching loh chuan zawh ngam pawh a ni ta lo ve. Hmun kilkhawr lehzualah phei chuan lirthei an tlan duh lo hi a âwm ngawih ngawih tihna ka nei, a tuartu tur erawh khawpui mi liante ni lovin thingtlanga mi rethei, lo neia ei zawng leh berh tete an ni leh dawn tho si a. - 9436360899 Gas vang chuan keini chhung, sikul naupang rual awmna chu min tibuai hle mai. Central YMA hmalaknaa a tam leh tan hi chu a lawm ber chhungkua kan ni awm e, YMA hian politician-te ai chuan mipuite hi min lo hmangaih ber mai ni hian ka hria. - Azuali