ZALEN October 23, 2024 : Vawiin hian MNF Treasurer Lalruatkima chuan Chalfilh bial khaw hrang hrang a tlawh a. Zawngin leh Suangpuilawnah te hun a hmang a, ZPM sawrkar chu development kaltlangna tur VC/LC te an palzut thin niin a sawi a, Sawhthing-ah mualpho an hlau niin a ngaih thu a sawi bawk.

Heng hmunah te hian Lalruatkima chuan thusawiin, "Home Minister Pu K Sangdanga'n Local Council leh Village Council term pawh tawi a nih tur a sawi hi a thlang tlingtu mipui zahlohna a ni. Mipuiin kan aiawha duh taka kan thlan tlin VC te ZPM sawrkar-in an thawhpui thei lo hi a pawi hle. VC/LC te hi development kaltlangna tur agency dik an ni. Chu chu ZPM sawrkar hian an palzut ta vek mai a ni," a ti a. "LC leh VC ni laite hmang duh lovin VDC an dinchilh a, hei hi mipui zahlohna nasa tak a ni a, democracy palzutna a ni," a ti.

Ruatkima chuan, "ZPM hian an party ni lo LC leh VC thawhpui an tum lo ringawt mai a ni. Mipui a thlang tlingtute an zah loh hle. Mipui sawrkar an din lo chiang hle. Kalphungthar hi kalphung a zawnga nawi ber leh ramhlui zia kalpui nasa ber, party mi vulh nasa ber an ni," a ti a. "ZPM hian LC leh VC inthlan hi Sawhthing thar hmaa inthlan an duh niin a lang, Sawhthing-ah hian an mualpho an ring niin a lang. ZPM hi anmahni reng mai an thawkho tha lo a, midang phei chu thawho pui harsa an ti hle a ni," a ti bawk.

MNF Treasurer chuan, "Sawrkar sum renchem hauh lovin an ham bawrh bawrh a, an invulhin a, chutih laiin mipuiah chhiah an ti sang awk awk mai a ni. A pawi hle. Sum lah an puk nasa tawh em em a, an buai tak zet a ni. Sawrkar mumal lo leh buai tak kan hmachhawn mek a ni," a ti bawk.

Ruatkima chuan, "Kan ti lovang, an tih an ti char char a, kan ti ang an tih an ti lo char char thung. ZPM kalphung thar hi a mak hle a ni," a ti a. "Kan ram kan hnam leh sakhua a him tur a ni a. Khawvel puma Zohnathlakte buaipui a, humhim a huaisen taka humhalh leh turin MNF kan sawrkar leh a ngai," a ti bawk.