ZALEN March 5, 2025; Agriculture minister PC Vanlalruata'n sawhthing chungchangah, chhungkaw khat atanga lei tur bithliah zat a awm lo tih sawiin, hun bituk bik awm loin, kumin a thar te chu a hralh theih chhung sawrkarin support price a pe dawn tih a sawi.

Vawiin assembly budget session zawhna leh chhanna hunah member te zawhna leh zawh belhna te chhangin agriculture minister chuan, sawhting leikhawmna secondary collection centre 62 an siam tih sawiin, secondary collection centre-ah auction tura ruahman a nih thu leh kg. khat Rs. 50 a tlin lohna chu support price hmangin kuthnathawktute hnenah pek a ni dawn niin a sawi.

Sawrkarin sawhthing lei a tum dan kimchang agriculture minister in house a hrilh danin, inbuatsaihna pakhatah secondary collection centre-ah auction a ni ang a, kg khat Rs. 50/- a chhangtu an awm loh chuan sawrkarin Kg. khat Rs. 50/- in a lak sak ang. Hei hi secondary collection centre mumal zawka kalpui a nih theih nana bultan chhung te, price sang zawka nawr a nih theih beiseina te, leh kan tharchhuah tam thut avanga buaina awm thei venna atana hmalakna a ni. 

Ruahmanna dangah chuan secondary collection center-ah auction a ni anga, kg khat Rs. 50/- a chhangtu an awm loh pawhin a chhang huai ber hnenah pek a ni ang. Rs. 50 a tlin lohna zawng chu sawrkar-in support price a pe ang. Sawrkarin sawhthing man a tum chin tur hi kuthnathawktute hnenah direct beneficiary transfer hmanga pek tura ruahman a ni.

Secondary collection center te hi society hnuaia sumdawnna puitling kalpui thei tura thuam chak a, helai hmun atanga hralh chhuah sawhthing man hniam lutuk tur, support price hmanga ven hi sawrkar tum dan a ni. Market nghelnghet zawk siam theihna tur a nih beisei a ni bawk. 

Agriculture minister chuan tun a support price an pek chu sawrkarin na a ti lo tih sawi bawkin, "Tunah hian sawhthing man a to chho a, marketing board lamin India rama sawhthing rate an a vil reng a, kuthnathawktute pawh lo hmanhmawh lo a, sawhthing to hun tur lo nghak hram hram turte pawhin an inzirtir," tiin a sawi.