ZALEN January 13, 2025 : Congress President Lal Thanzara, chuan sawrkar chu Sawhthing an lei theih dawn leh dawn loh hriat a nih hmaa VC inthlan zawhfel an duh niin a sawi.

Mizoram Pradesh Congress Committee chuan vawiin khan Bhavan hawn inkhawm, Golden Hall, Congress Bhavan ah an hmang a, he Bhavan inkhawmah hian Lal Thanzara chuan, "Hmanni lawk April 2024 khan Assam Rifles chhuah hun tur kha a lar a, tunlai hian February ni 20 a lar leh ta a. Kan sawrkar hian VC Term pawt tawiin Febuary ni 19 ah an ti tawp a. Chumi hma chuan VC inthlan a ngai ngei ngei a ni. Sawhthing an lei theih dawn leh dawn loh hriat a nih hma inthlan zawhfel ah duh a, VC inthlan zawh ah chauh sawrkarin sawhthing lei an tum a ni," a ti.

"Special Assembly a ka puan tawh ang khan, Congress kan sawrkar leh anih chuan kan Bible in a sawi, 'Heng ka unau te ber te chunga in tih hi ka chunga ti in ni' a tih angin, Mizoram mipuite tan NLUP kan tharthawh leh dawn a ni," a ti bawk.

Boruak thianghlim kan neih theih nan Halpuah leh Halmawi Kristmas leh Kumhlui thlah zana Sawrkarin a khap chu Kohhran leh Central YMA te thlawpna avangin kum dang aiin kan uar lo kha a lawmawm ka ti a. Ram leh mipuite thatna tura sawrkar hmalakna te chu Congress Party chuan kan thlawp zel dawn a ni.

Congress President chuan "Kumthar atana ka thuchah duh che u chu Thufingte 16:3 ah chuan 'Lalpaa innghatin thil ti la, i thiltum chu a hlawhtling ngei ngei ang,' a ti. Congress party ten kan thiltih turah te Lalpaah innghah nachang i hre thar zel ang u," tiin kalkhawm te a chah.

AICC Member leh Mizoram Chief Minister hlui Dr. Lal Thanhawla pawhin thu sawiin, "Kan hotute hian kan tih theih loh tur ti turin an insawi ngai lovin ka hria. Lengpui Airport kan siam lai pawh khan 'Choak bak a tum lovang' min tih sak thin. Mahse kan hman tangkai zia in hria a, a hlawhtling hle a ni. Amaherawh chu tihral chak tlat te kan lo awm a, a pawi hle a ni.

Look East Policy te hi kan hotuten hmathlir thui tak neiin an ruahman a ni. Khawchhak lam Vietnam, Cambodia leh Myanmar thlengin kan insumdawn tawn anga, kan inunauna pawh a lo tha chho ang kan ti a, Prime Minister Manmohan Singh pawh khan tha a ti hle a ni. Champhai thlengin kawng kan sial a, tunah chuan kawng tha tak kan lo nei ta a ni. Amaherawh chu sawrkarah kan awm ta lova, kan ruahman angin kan tihlawhtling hman ta lo a ni.