ZALEN July 24, 2025 : MPCC Spokesperson Dr.Lallianchhunga chuan vawiin khan Sairanga sawhthing dah khawmna hmunpui tlawhin, sawhthing an lei khawl sa Mizoram sawrkarin a buaipui zui dan a hmunah a en a. Sawhthing lei khawlsa hi a tawih nasa tawh hle a, chung sawhthing tawih te chu hmun engemaw zatah paih khawm a ni a. Ruah surin len bo nual tawh mah se, sawhthing tawih an paihna sulhnu erawh hmuh theih a la ni a. Road Map awm miah lo va sawhthing hi buaipui a ni tih a lang a ti. 

Dr. Lallianchhunga chuan Sawhthing hi a hmunah vai hoin Kg 1-ah Rs.3 leh Rs.5 ten an lei a, mutria ten bag 1-ah Rs 10 hlawhin motor ah an dah lut ṭhin a ni. Mizoram sawrkarin Sawhthing a lei khawl hi thar beisei zat atangin zaa 15 (15.71%) vel chauh a ni a, thar chhuah tura beisei zat atangin zaa 84 chuang (84.29%) a lei hman lo tihna a ni a. ZPM sawrkar thil kalpui dan fuh lo avangin sawhthing chingtute’n Kg 1 Rs.50 aia sangin sawhthing an hralh theih loh phah a. Sawhthing lei danah ZPM sawrkar hian sawhthing chingtute beisei a pha lo nasa hle a ni a ti bawk. 

Sawhthing tihral dan an buaipui zui danah Dr. Lallianchhunga chuan ZPM sawrkar chu a hnuaia zawhna 2 hi a zawt.

1. ZPM sawrkar thar lakluh ni, Dec 8, 2023 a CM thar, Pu Lalduhoma’n Press Conference a neih tum khan ‘Kan Minister tin te hi an Department chan ṭheuh an enkawl dan tur ROAD MAP ziakin kan nei vek a ni. Chu chu Minister tin te kan pe vek dawn a. Chumi dungzui chuan, a tlachawp ni loin, ngaihtuah hranpa pawh ni loin, kha policy kan lo duan tawhsa hmang khan an Department chan ṭheuh an enkawl dawn a’ tih thu khauh takin a sawi a. Tuna sawhthinga kalpui dan buarchuar tak, kuthnathawktute ti beidawngtu hi ZPM sawrkar Road Map-ah a tel em?

2. Hmunphiah hi thar chhuah beisei zat aṭangin zaa 59 chuang (59.49%) lei loh a ni a; Aieng phei chu thar chhuah beisei zat aṭangin zaa 99 chuang (99.49%) lei loh a ni a. Thlai thlan chhuah lei a nih danah hian Campaign laia an sawi uar tak Research Based a tih engmah a awm lo tihna a ni em?

Dr. Lallianchhunga chuan, "Sumdawng ten inhralh har an tih chhan hi kuthnathawktute leh mipuite kuta sum a luh ṭhat tawk loh vang a ni ber a. Kuthnathawktute kutah sum lut tak tak selang chuan khawtualah sum lengvak a tam ngei tur a ni a, hai theih a ni lovang. Contract hna inpek danah pawh mi pakhat hminga Nuai 2000 chuang man Restricted Tender hna inpek a awm tih sawi a awm a. Hei hian ZPM sawrkar chu mi tlemte te hausakna tura mahni intiamna ngei pawh phatsan leh duh an ni tih a tilang chiang hle." 

"ZPM Minister te lah mawhphurhna la ngam tak tak lova midang puh thiam tak, Chemtatrawta Sawrkar dintute an ni a. Hetiang sawrkar hi tunhmain Mizoramin kan la hrawn ngai lo a ni. Sawrkar nawn an tum tawh lo va a lan avangin Congress party chu ZPM sawrkar thlaktu turin mipuiten beiseina nen min thlir mek a. Pathian Malsawmna leh mipuite duhsakna zara kan sawrkar chuan Mawhphurhna la ngam sawrkat tha kan ding ang," a ti bawk.