ZALEN February 27, 2025 : MPCC Farmers Department Chairman Lalrinliana chuan ZPM chhung inkhawma Horticulture Minister zahawm tak Prof. Lalnilawma'n Chamring leh Sailam atanga Sawhthing an lei chungchanga kuthnathawktute a dem chiam mai chu pawi an ti a, Sawhthing leitu MzSRLM te fimkhur tawk lohna chu a mawha a la ngam tur zawk a ni an ti.

MPCC Farmers Department ten vawiin press conference an neihah Lalrinliana chuan, "February 10, 2025-a Chief Minister ho a Sales Letter an inhlan kha Tripartite Arrangement- Mz State Rural Livelihood Mission, Ropuiliani Farmers Producer Company Ltd leh Reliance Retail Ltd te inkar a ni. February 24, 2025-a ZPM chhung inkhawmnaa Minister zahawm tak Prof. Lalnilawma’n Chamring leh Sailam atanga Sawhthing lei chungchanga Sawhthing ching tute dem zawnga thu a sawi chiam mai kha a pawi kan ti," a ti.

"Ropuiliani Farmers Producer Company Ltd hi MzSRLM hnuai an Society/Self Help Group an nia hriat a ni a, MzSRLM hi Rural Development Department hnuaia Mission a ni a, engvangin nge Sawhthing an thawn chhuah tur hi an thawn chhuah hma hian MzSRLM te hian uluk taka an check loh, an Minister berin eng vangin nge a Department te mawhphur tir lo va Farmers harsa te te hetianga mawh a phurh tir?. Chamring leh Sailam-a Sawhthing chingtu chhungkaw 55 te rilru a na hle a. Hetiang thil a lo thlen takah chuan a Deparment chan MzSRLM te fimkhur tawk lohna hi Minister mawhphurhna a ni a moral responsibility a la ngam tur zawk a ni," an ti bawk.