ZALEN March 4, 2025 : February 20 atangin sawrkar chuan District 11-a, Collection Centre 60 chuang an buatsaih atangin Sawhthing Kg 1 cheng 50/- a an lei a, Hriat theih chinah Inrinni thleng khan Mizoram Agricultural Marketing Board (MAMB)-in Mizo-ram puma sawhthing chingtute hnen atangin an Sawhthing thar chhuah quintal 18,987.80 a lei tawh.

Hetihlai hian Maite leh an khaw thenawm Hmuntha khuate chuan quintal 10,000 chuang ve ve thar thei turah an inngaih thu ZALEN an hrilh. Sawrkar hian khaw hrang hrangah Kg bituk zat neia a lei avangin Sawhthing chingtu ten an dinhmun tur an ngaihtuah thiam rih lo tih an sawi.

Khaw hrang hranga Sawhthing chingtute chuan an khua-a society te hnenah an thar theih zat tur te an report thin a, tuna a landanah chuan an Sawhthing te hi sawrkar hian a lei zawh sak vek an beisei lo a, sawrkar rate aia tlawmin mimal hnenah an hralh reng tho a, sawrkar chu beisei takin an thlir.

Sawhthing thar tam thin khua, Maite khua atanga ZALEN thudawn danin kumin hian report an dawn tawh atangin Quintal 10,800 vel thar chhuak turah an inngai a, sawrkarin an lei tawh chin chu Kg 40 bag 200 a nih thu an sawi. Tunah hian private in an hralh ve reng tho a, kumin hian Kg-ah 36 chu a rate san lai ber an ti a, Kg-ah 25 te pawhin an hralh a, tunkar bikah hi chuan an hralh loh thu an sawi. Maite khua hian Sawhthing hi Kg-ah cheng 127-in 2014 khan an hralh a, hei hi an hralh that ber kum tih an sawi a, nikum khan cheng 90 chuanga hralh tum te an neih thu an sawi bawk.

Tender system-a kum engemaw zat lo kal tawh Hliappui khua a society hruaitute chuan kumin hian an huamchhungah Sawhthing hi quintal 7000 - 8000 vel thar theih an beisei thu an sawi a, vawiin khan sawhthing hi nuai 30 man vel sawrkarah an hralh. Sawrkar lam ngenna avangin anni hi chuan an tih thin ang bawkin tender system a kal leh tumin an inbuatsaih tih an sawi a, tunah hian biak chiah erawh an la nei lo an ti. Anni hian 2023 kha chuan Kg-ah 109 ten an hralh an ti a, nikum lam kha chuan Kg-ah 70/80 vel ten an hralh tih an sawi bawk.

Sawhthing thar hnem thin Hmuntha, Serchhip district chuan kuminah hian an Sawhthing lin zat ngaihtuahin quintal sing khat chuang chu thar turah an inngai a, mahse, an thar tling ang em tih an hre thei bik lo a, mahse, sawrkarin a lei hmasakberah khan quintal 200 an lak sak a ti a, a bak pawh rate tha taka hralh an beisei tih an an sawi.

Kuthnathawk nasa khua tih a hriat hlawh Khawbel atanga thudawnna chuan an Sawhthing thar tam zawk chu an cho ngam rih lo a ti a, sawrkarin Kg 100 vel a leisak bak chu a nawlpui chuan an cho rih lo a ti a, mimal hnena Kg-a 27-a hralh tlem a zawng an awm a, chumi hnuah Kg-ah 32-in an hralh leh bawk. A tam zawk chuan a chi tur bak an cho rih lo niin an sawi.