Finance Dept. in coronavirus dona atana Health Dept sum dil hnawlsak

Zalen in RTI a dilchhuah atanga a lan danin Health & Family Welfare chuan February 3, 2020 khan Finance Department-ah Coronavirus laka invenna atan 'Public Health Action Plan for Prevention and Containment of Novel Corona Virus Disease in Mizoram' tih hmingpu in proposal an thehlut a, hetah hian he hripui laka invenna tura an mamawh te chu tarlan a ni a, an sum dil hi Rs. 132,00,000 a ni. Mahse, February 25, 2020 khan he an dilna hi hnawl sak an nihna Director of Health Services, Mizoram Aizawl chu lehkha a hriattir a ni a, Revised Estimate 2019-20 leh Budget Estimate 2020-21 peihfel an tum hnaih chu an hnawl chhan niin tarlan a ni.

Directorate of Health Services, Health & Family Welfare Department, Government of Mizoram chuan Finance Department-ah hian Coronavirus laka inevenna tura an mamawh an ziah zingah hian an hnuaia hnathawk te training na tur sum te, ramri a screening neih na tur sum te bakah hri enna khawl te, Ambulance, chanchinbu leh cable TV lama Awareness campaign neihna tur sum te, thisen sample thawnna tur lirthei hman man te, thisen sample lakna atan leh inenkawl lailawkna atana Lengpui PHC leh Zoram Medical College (ZMC), Falkawn thawm thatna tur te bakah nitin mamawh tur te an dil a ni.

Health & Family Welfare Department lam hian an dilnaa an thehluh lai hian World Health Organisation (WHO) chuan khawvel pumah 'Health Emergency' a puang tawh a, ram 26-ah he natna hi a kai tawh tih hriat niin India ramah pawh Kerala state-ah vei an awm tih finfiah a ni tawh bawk. Ministry of Health & Family Welfare, Govt. of India pawhin hetihlai hian state leh union territory te chu Integrated Surveillance Programme (IDSP) hnuaiah an hmanraw neih te changtlung zawka siam turin thurawn a pe bawk.

Aizawl : Covid -19 vei enkawltu te invenna hmarua atana Mizoram sawrkarin a lei, a chhia nia sawi hlawh tak PPE leh a kaihhnawih bungraw chungchanga RTI hmanga zawhna ah a leina sum bikah felhlel a awm lem lo niin a lang a, invoice ah PPE 11,000 te chu set kim nia tarlan a ni laiin H&FW Department in RTI a chhannaah a kim lo nia tarlan a ni thung a. Hetih lai hian heng bungrua te hi file process pangngai hmanga lei a ni lo tiha chhan niin State Purchase Advisory Board paltlang lova lei a nih thu pawh tarlan a ni bawk a. PPE kit hi chhia leh thawm that ngai a awm lo niin RTI chhannaah hian tarlan a ni bawk. Hetih lai hian H&FW Deptt. in 'Novel Corona Virus' dona leh invenna atana pawisa a dilna (3rd Feb,2020) chu Finance Department in Revise Estimate leh Budget Estimate an khawih lai a nih avangin hnawl a nih thu chhanna ah hian an tarlang.

Sawrkar hian PPE gown 11,000 hi hi March ni 27, 2020 ah a chah thleng a, pakhat hi Rs. 997.27/- a lei niin a vai hian Rs. 1,09,70,000/- a ni a, shoe cover hi 9,000 a lei a, pakhat hi Rs. 15.75/- a lei ang a ni a, a vaiin Rs 1,41,750/- sen a ni a, N-95 Mask 15,000 lei niin pakhat hi Rs. 367.5/- man a ni a, Rs 36,75,000/- an seng. PPE Kit chah luh te hi a set tur ang thlap chuan a rawn thleng lo niin RTI zawhna chhan a ni bawk. Invoice/ memo dilchhuah atanga a lan dan chuan 'PPE set kim' 11,000 lei niin tarlan a ni a, mahse, Health & Family Welfare in RTI-a chhanaah erawh 'set kim' a nih loh thu tarlan a ni thung. 3,000 nos chu set kimin a rawn thlenga, 8,000 nos erawh set kimin a rawn thleng lo thung. (Note: Invoice dil chhuahah hian bungraw lei te hi a mal (item/rate) anga tarlan niin, RTI chhannaah erawh chawhruala chhan a ni.)

PPE gown, face mask te hi Malik Pharma, Beri Road, Sampla, Rohtak, Haryana atanga an lak niin, a siamtu hi Dhrithi Surgical Solution Pvt. Ltd. a ni a. Mask leh shoe cover hi Infinity International, C-898, DB, Sushant Lok, Phase I, Gurgaon atanga lei a ni. Heng bungrua lei tur hian sawrkar kalphung pangngai zawm a ni lo a, inbiakna anga lei nghal niin file hmanga kalpui a ni lo a, note sheet pawh a awm loh bakah State Purchase Advisory Board a paltlang lo a, hmanhmawh thil a lei an nih avanga paltlang hman a nih loh thu pawh an tarlang tel a ni.

PPE kit lo thlengte chu a him tawk lohna a awm lo niin RTI hi chhan niin a him vekin a rawn thlenga, siam that ngai a awm lo nia tarlan a ni bawk.

PPE Kit a hlawma chah a nih hma hian Aizawl-a mimal sumdawng atangin PPE Kit hi a tirah 300 lei sak a ni a, hei hi thuam chikim (gown, N-95 mask, shoe cover, goggle, gloves kim thlap) niin hak khat Rs. 2,575 a ni. Tualchhung thui (gown chauh) hi RTI chhan chinah 1,090 lei niin, pakhat hnen atangin 542 nos. lei a ni a, pakhat Rs. 300 a lei a ni. A dang (gown chauh) hak 548 hi pakhat Rs 508.4/- a lei a ni bawk. Hei bakah hian PPE 500 chu pakhat Rs. 1,100 a lei a ni.

Heti hian March thla atangin RTI zawhna chhuah ni 27.05.2020 thlengin PPE (kit kim leh gown chauh) 12,890 lei a ni tawh a, hemi atan Rs. 1,27,33,720/- hman a ni. Mask (15,000 nos) leh shoe cover (9,000) atan 38,16,750/- hman tawh a ni.

RTI chhanna atanga a lan dan chuan PPE cover all -11,000-ah hian ISO 9001 & ISO 13485 Certified Company ziahlan a ni a, a siamna atana material an hman hi a hriat loh a. Shoe Cover-ah pawh hian an hmaraw hman tarlanna a lang lo a, chutiang bawkin 3 play face mask-ah pawh. Surgical glove erawh Ambidextrous AQL 1.5 Micro textured a ni tih a lang a, ISO 90001-2015 ISO 13485 Certified Company a chuang bawk.

PPE set 11,000 leh shoe cover 9,000 man hi Disaster Management & Rehabilitation Department sum atanga lei niin RTI a zawhna hi chhan a ni a. DM&R atanga H&FW in sum a hmuh tawh chu 3,05,05,200/- niin hei hi May 8, 2020-a an dawn a ni. Procurement of essential equipment/ labs for response to COVID-19 atan hian Rs. 99,95,200/- chu dah a ni.

April 14, 2020 khan India siam tuna Zoram Medical College (ZMC) a Real-Time–Polymerase Chain Reaction (RT-PCR) test atana hmanrua Testing kit, India siam - Viral Transport Medium (VTM), High Media hi 1800 hi Air Force Dornier Aircraft hmangin rawn phurhluh a ni a. April 25, 2020 kha Mizoram hian Rapid test kit (IgM/IgG), Rapid Antibody Test (RAT) kit hi 7,000 a ti thleng a, Indian Airforce thlawhna VUFBG HEAVY, AIFF II 76-a rawn phurh thlen niin, Sensing Self, Pte Ltd, 160 Robinson Road, 20-30, Singapore Business Federation Ctr, Singapore company atanga chah thlen a ni a, pakhat hi Rs. 699/- man a ni a, a vai hian Rs. 48,93,000 man a ni. (Note : Hemi invoice hi RTI chhannaah hian telh a ni lo.)