Aizawl: Hnahlan leh Champhaia grape society pahnihte chuan sawrkar atanga thuthar an la dawng lo chungin tunlai hian kuthnathawktute grape tharchhuah an lei mek.

ZALEN-in Hnahlan Grape Growers & Processing Coperative Society hruaitute hnen atanga thu a dawn danin tun dinhmunah grape quintals 1,600 vel an lei tawh a. Grape rah hi an la lei mek a; mahse, an duh anga tam lei tur an hmu dawn lo niin an sawi.

Hnahlan Grape Growers & Processing Coperative Society hruaitute chuan, “Sawrkar atangin thu lawmawm la hre chiah lo mah ila beiseina sang tak kan nei a. Grape rah hi thil chhe hma tak a nih avangin kan lakkhawm vat loh chuan a chhe mai dawn a. Chuvangin, mipuiin an tawrh ai chuan tawrh a ngaih pawhin society in tuar mai se kan ti a ni,” an ti.

Hnahlan grape chingtute chuan sawrkarah beiseina sang tak an nei tih sawi bawkin bialtu MLA-in thahnemngai taka hma a lakpui avangin lawmawm an tih thu Zalen an hrilh bawk.

Champhai Grape Growers Society hruaitute pawhin kuthnathawktute grape an lei tawh zat chu kgs. 70,772.74 a ni tiin hemi atana sum sen tawh zat chu Rs. 42,46,356.00 a ni tih ZALEN an hrilh a. Grape chu lei chhunzawm zel an tum tih sawi bawkin kuminah hian quintal 2,000 vel lei an tum laiin an duh khawp lei tur an hmu zo dawn lo niin an sawi.

Grape chungchangah sawrkar atangin thuthar la hre lo mah se hma an la chhunzawm zel tih sawiin, “Special cabinet meeting-ah emaw, by circulation-in emaw min tihfelsak thuai kan beisei a. Wine rules hi chu a awm hrim hrim tawh kan beisei a ni,” an ti bawk.
Champhai Winery hian tunlai hian grape tui thun bottling hna an thawk mek.