Aizawl August 4, 2022: ZPM MLA ten vawiin khan Solid Waste Management Centre (SWMC), Tuirial an tlawh a, ZPM Leader Lalduhoma chuan kan lui dunga bawlhhlawh paih loh tura min zirtirtu ber sawrkar ber hian lui dungah kan bawlhhlawh te a nawr liam hmiah hmiah a, a dik lo hle a ni, a ti.

ZPM Leader Lalduhoma chuan, “Gate han luh chiah hian a hmun tura ruahman ni miah lovah bawlhhlawh a vum thur a. Kawng sirah bawlhhlawh a an chhek mai mai a, kal harsa khawpin a awm a, he kawr hian Tuirial lui a fin a; kan lui dunga bawlhhlawh paih lo tura min zirtirtu ber sawrkar ber hian lui dungah kan bawlhhlawh te a nawr liam hmiah hmiah a, a dik lo hle a, hei hi a pawi em em a ni,” a ti.

Duhoma chuan, “District headquarters panga-ah SWMC tur hi cheng nuai 60 theuh pein hma an lak tir a, building pakhat mah a la ding lova, pakhatmah a la function lova, heng te hi chak zawka hma kan lak loh chuan kan ram leilung kan ti chhe mek ni. Mi-in In an sa a, in an thiat a, Ip-a han khung mai theih loh motor liana trip tham mi pakhat pawhin paih tur te an nei a, chumi paihna hmun tur chu sawrkar hian a buatsaih lo a ni. Sawrkar berin a buatsaih miau loh chuan a rukin zanah kawngpui sirah te an paih a, khawiah nge an paih chuan ang, paihna tur hmun sawrkarin a buatsaih loh avangin hetiang hi a thleng a, kan sawrkar hian a tihtur hi a ti lo hle a ni,” a ti.

Bawlhhlawh kan paih dan hmun tinah a fuh loh thu sawiin, “Thingtlang khaw tam takah bawlhhlawh paihna an nei deuh thluah tawh a, chutah chuan bawlhhlawh an paih khawm a, a thlang kawrah a tawlh thla a, chutiang chuan kan ram lui lianah a luang khawm a, khaw tin thli hi kan ramah hian nungcha te tana chet hleihtheih loh turin kan siam mek a ni. Heti ringawt hian bawlhhlawh hi paih tur a ni lo a, 'Hmun tina darh tur kha hmun khatah pawi khawih tur khawpin i chhekkhawm teh ang, helai hmun hi chu ram leilung leh luipui a finnaah pawh luipui tichhe tham law lawin kan bawlhhlawh hi hmun khatah i paihkhawm teh ang u,' tih ang lek a ni. Chuvang chuan heng hian awmzia a nei lo em em mai a ni. Hemi kawngah hian a mipui mimir pawh kan harh a, sawrkar pawhin hma a lak vat vat a ngai a,” a ti.

Dr Vanlalthlana, MLA pawhin, “Solid Waste Management Centre hi Assembly Session-ah pawh kan lo sawi fo tawh a, tunah hian enkawltu nei lo ang maiin a awm a ni. He hmun hi UD& PA in AMC hnenah ni March ni 8, 2021 khan a hlan a, an inhlan hian a hmaa UD&PA hnuaia bawlhhlawh sawngbawlna enkawltu SIPMIU hian AMC hi la enkawlpui zel tura tih a ni. Tunah hian SWMC hi enkawltu nei lo ang mai niin, weight bridge pawh hman theih a ni tawh lova. Mipuite bawlhhlawh min thliar hran tir laiin SWMC lamah erawh bawlhhlawh pawh thliar hrang mumal tawh lovin, a remchanna  apiangah an paih mai mai tawh a ni ber a. Heng bawlhhlawh te hi lui kawr lamah paih liamin kan lui tui leh nungcha te tana hlauhawm thei dinhmunah a ding niin kan hria a, ennawn a tul hle a ni. Sawrkar hi kawng tha zawk zawh tura koh harh kan duh avangin helai hmun hi kan tlawh a ni,” a ti ve bawk