ZALEN May 18, 2025 : Tun hnaiah Mizoram sawrkar website thenkhat chu mi sualin an khawih chingpen (hack) zauh zauh chungin data pawimawh bo leh pu chhuak a la awm lo nia hriat a ni.

ZALEN-in Information & Communication Technology (ICT) department thawktute hnen atanga thu a dawn danin Mizoram sawrkar department website khawih buai (hack) thintute chu a tlangpuiin Indonesia leh Pakistan-a hacker-te an ni tlangpui tih an sawi.

Data pawimawh bo leh put chhuak a awm lo nia an hriat thu sawiin, “Sawrkar website-te hi a theih chin chinah veng mah ila hacker-te hian khawih theih chin an nei a; mahse, an khawih chin hi chu a pawi lutuk lo chin niin kan hria a, data pawimawh put chhuak a awm lo niin kan hria a. Heng mi sualte thiltih hi a pawi tham lem lote an nih avangin kan siam tha leh mai zel a ni,” an ti.

ICT thawktute chuan website chu him famkim (100% secure) a awm lo tih sawiin, “Software leh server hi tihchangtlun (upgrade) ve reng a ngai a, uluk taka enkawl chung pawhin kum nga hnu velah chuan thlakte a ngai thin a ni,” an ti.

Mi sualte chu man chhuah an har nia sawiin, “Ram dang daihte atanga khawih chingpen a nih thin avang hian man an har a. Tuna sawrkar website hack thintute hi chuan pawi lian khawih lovin eng emaw a lan dan tidanglam leh thil eng emaw lo dahte an ni a. Data base an khawih loh bakah a lang chinah eng emaw dah maite a nih vangin an khawih danglam hi siam theih loh kan la nei lo a ni,” an ti a. Hacker zingah Mizo an awm an la hriat loh thu an sawi bawk.