ZALEN February 27, 2025 : Transport Minister Vanlalhlana chuan vawiin khan SASCI Part II hnuaia V-VMP / VSP kaltlanga MoRTH atanga dawn lirthei 27 te chu Department 17 te hnenah a hlan a, Minister hian programme hman zawhah heng Lirthei 27 ten an Department theuh an pan tur chu a vailiam nghal a ni.

Voluntary Vehicle Modernization Policy (V-VMP), Vehicle Scrapping Policy (VSP) ti pawha hriat hi (SASCI Part-II) Ministry of Road Transport and Highways (MoRTH) in lirthei hlui tawh te hluihlawn a, a thara thlak tura lirthei neitute tana ruahmanna a siam a ni.

He huna Technical report petu Transport Director Er. R. Lalrammawia chuan V-VMP in a tum chu Air Polution tih tlem, Environment te tih thianghlim, Lirthei hlui tawh lutuk avanga chetsualna thleng thin te tihtlem bakah fuel efficiency tih san a, maintenance cost tihtlem a ni. Automotive, Steel leh Electronic Industry te tan Recycle hmanga man tlawm zawkin Raw material tihtam leh mi tam tak tan eizawnna siam a ni, a ti.

Transport Director chuan VSP hian commercial leh passenger vehicles fit tawh lo te mahni thu a hluihlawn tir te, sawrkar lirthei kum 15 aia upa tawh chu registration tih thih vek [(De-Registration), (Private leh sawrkar lirthei Kum 15 la ting lo pawh Automated Testing Stations (ATS) in fit lo a tih chuan a huam vek ang)] leh Private Lirthei kum 20 tling tawh registration tih thih vek te a ni a ti a. Department tin te RVSFs peihfel hma chuan an Lirthei kum 15 tling tawh chu Normal Condemnation lo ti vek turin a ngen.

He policy hian hamthatna hrang hrang a nei a, VSP hnuaia lirthei hluihlawn te chu Non-transport vehicles-ah Tax 25% discount a ni ang a, transport vehicles-ah Tax 15% discount a ni ang. Registration fee a thlawn ang a, Lirthei siamtu company ten Lirthei thar an lei hunah Discount a pe bawk dawn a ni.