ZALEN October 14, 2024 : Minister Lalthansânga (Chate-a) chuan, "Kum 40 dawn sawrkâr lo kal tawh dan hi thawk leh khata thlâk hlawk theih ni lo mah se, zawi zawiin a insiamrem chhoh zêl a, inrenchemna kawngah sawrkâr a kal nasa a, sawrkâr officer-in office a TV an kawl theih dânte leh kalphung thenkhat dangte pawh siam that zel niin, sawrkâr hi zawi zawiin kawng dik lam panin a inher mêk a ni," a ti.

Vawiin ZPM chhûng inkhawm thusawitu Lalthansânga chuan sawrkârin uluk taka sum a enkawl thu sawiin, "Sawrkar hmasain April-August, 2023 chhûnga a sum pûk chu Rs Vbch 1936.4 a nih laiin, ZPM sawrkâr-ah April - August, 2024 chhûnga sum kan pûk zat chu Rs Vbch 977.7 a ni a, ZPM sawrkar-ah erawh chuan hun bi in ang rengah kan lei bat zat chu cheng vaibelchhe sâng chuangin sawrkâr hmasa nen a inthlau a ni," a ti.

Sericulture Minister Châte-a chuan sawrkâr tharah phai lam mithiamte pawh an phur a, mithiam-te'n hmasawnna hna thawh kawnga kut rawn thlâk an châk nia sawiin, "Central Board of Silk Conclave pawh sawrkâr tharah Mizoramin kan thleng a, Guwahati khawpui tih lohva India hmarchhaka a thleng hmasaber kan ni", tiin, "Muga (Pangang chikhat) Project-ah pawh benefeciaries 500 vel thlan an ni dawn a, Mizoram chauh hi India hmarchhaka Muga khawi theihna awm chhun kan ni," a ti.

Chate-a chuan, "Rubber President of India pawh Mizoram-ah a rawn zin tawh a, tunah hian Chief Minister Rubber Mission chu kalpui chhoh tan niin, Zirtiri Residential Science College hmun hluiah Training Centre buatsaih a ni dawn a ni," tiin, "Mizorama sangha thar tam theih dan tur zirtirna neiin phai aṭangin mithiam rual pawh vawi thum lai an lo kal tawh," tiin phai lam mithiamte'n kal phung thar sawrkârah beisei an neih san thu a sawi.

Lalthansânga chuan "NEC atangin kuhva scope leh a ro siamna tur project min rawn pe dawn a, country of origin certificate dik tak Mizoramin kan pe tawh dawn a ni", tiin, ZPM sawrkârah kuhva tawlh rûk a kim kit thu a sawi bawk.

Chate-a chuan, "Tawngtaina nena sai ip puan sina kan dilnate Pathianin min chhâng a, Mizoram hian kawng dik a zawh tan a, kan tanhona leh Pathiana kan tluk luhna hian awmzia a nei ngei ang," tiin tangho zêl turin party mipuite a sâwm.