Aizawl April 24, 2023 : April thla tawp dawn thleng pawha Mizoram sawrkar hnathawk tam takin April thla hlawh an la thei lo chu Congress Party chuan mak an tih thu thuchhuah an siamah an tarlang a, Finance enkawltu Chief Minister Zoramthanga hlawhchham zia a tarlang-ah an ngai.

MPCC chuan, "Vanglaini chanchinbu-a Finance Department insawifiahna ‘IFMIS hman thiam loh vang a ni’ tih hi Department hrang hranga hlawh siamtute kan kawmnaah a dik tawk lo tih a lang a. India rama sawrkar sum enkawl dan thar, Integrated Financial Management and Information System (IFMIS) hian harsatna tam tak a thlen ngei a. Amaherawhchu, he harsatna hi Department te thiam loh ni lovin, IFMIS system-ah fel lo tam tak a awm vang zawk a ni  a. Kum 2 kalta atanga he system hi hman tura tih a nih rualin, vawiin thlengin system-ah fel lo a tam a, portal a luh theih loh te, approve theih mai loh te, luh hleih theih loh chang te, bawhzui fe pawha approve mai theih loh te a tam em em a. Hei hi Sawrkar thiam loh dik tak a ni a, a bikin Finance Minister Zoramthanga’n mawh a phur lian ber a n," an ti.

Congress chuan an hunlai khan sawrkar hnathawk nghet te hlawh lak theih loh a awm ngai lo, an ti a, sawrkar hnathawkten Congress sawrkar hnuaiah a hun taka hlawh an lak mai bakah GP Fund leh Bill hrang hrang hun rei tak tih khawtlai a awm ve ngai lo tiin, "MNF sawrkar hnuaia hetiang taka Finance management a buaina a thleng chho ta hi MNF sawrkar leh Finance Minister, CM ni bawk Zoramthanga hlawhchham zia a tarlang chiang hle a ni," an ti.

Congress Party chuan Mizorama sawrkar hnathawk zawng zawngte ram sum leh pai enkawlna kawngah thil kal tawh thlir let a, thil nihna dik tak hre tura ngaihtuahna tak tak seng turin an duh, ti sawiin, "A sawi thiam apiangte sawi awih ringawt lovin, an dang nala tlu ringawt lo a thil tak tak ngaihtuah turin kan duh a ni. Congress Ministry liam ta kha  duhthusam ni lo mah se, tuna MNF sawrkar hnuaia Mizoram sawrkar hnathawkten harsatna an tawh thin tam tak ang hi Congress sawrkar hnuaiah khan an tawk ngai lo tih hre nawn leh turin kan ngen a ni," an ti bawk.