RTI : Jail dinhmun 
Damchhung tang tur (lifer) a thiamloh chantir tawh mi 50 an awm, a tlangpuiin tualthat (302 IPC) leh POCSO thubuai nei an ni. 

2010-22 chhunga tang tlanchhuak la man loh zingah hmeichhe 2 an tel.

Sawrkar hnathawk jail tang mek te chu tualthah, POCSO leh rukruk vanga tang an ni.

Aizawl; Mizoramah kum 2010-22 chhungin jail tang tlanchhuak mi 23 an awm a, chung zinga mi 8 te chu la man loh an ni. Hetihlai hian thubuai hrang hrang vang a jail tang sawrkar hnathawk mi 11 an awm mek.

Prisons department SPIO-in RTI zawhna a chhanna ah Mizoramah jail 10 (hmeichhe jail hran nen) a awm mek a, mi 1,386 awm theihna a ni. Sawrkar hnathawk jail tang mek mi 11-te chu tualthah thubuai te, POCSO leh rukruk vanga tangte an ni a. Kum 2010 atanga kumin chhungin tang tlanchhuak mi 23 an awm a, chung zinga mi pathum chu hmeichhia niin tun thlenga la man loh mi 8 (mipa 6 leh hmeichhe 2) an awm.

Tang tlanchhuakte chu a tlangpuiin staff indaih lohna avang leh infrastructure vang tih tar lan a ni.

Prisons department chuan Mizorama jail-te siam thatna turin DPR-te siamin, central-ah leh Mizoram sawrkarah a thehlut a, DPR chu buaipui chhunzawm zel niin, hengte bakah hian Modernization of Prisons project hnuai atangin Central jail-ah ward pakhat sak belh tum mek a ni.

RTI chhanna atanga a lan danin, District jail, Aizawlin lirthei kawl an nei lo a, a bak jail dangten ambulance (jail tangte damdawi ina refer-na tur) an nei vek a, lirthei dang kawl an nei lo. Hmeichhe jail-in Central jail ambulance an ring bawk.