July 21, 2022; Tourism department chuan Mizorama a tourist lodge te chu khualzin te leh zin mite tan a buatsaih a ni tih tarlangin, sawrkar hnathawkte duhsak bik theih an nih loh thu an tarlang.

Hemi chungchangah hian Principal Secretary, Manisha Saxena, Tourism department chuan July ni 20, 2022 khan office memorandum tichhuakin, sawrkar hnathawk ten tourist lodge a an thlenin duhsak bika lo dawnsawn beiseina a awm thin tih hriat a nih thu leh chu chuan a hmun enkawltu, hnathawkte dinhmun laklawhah a siam thin thu a tarlang.

Sawrkar hnathawk thenkhat te'n an mikhualte tan room lo book/block turin hnathawkte an hriattir thin tih hriat a nih thute, Tourism department in room book nan online system a hman vek tawh avangin hei hian buaina lian zawk a thlen fo thu te a tarlang bawk.

Tourist lodge te chu khualzin te leh zin mite tan a buatsaih a ni tih tarlang bawkin, sawrkar facility hrang hrang, Circuit House, Mizoram House, State Guest House etc. te anga ngaih tur a ni lo tih office memorandum ah chuan a tarlang. 

Tourism department in www.mizoramtourism.com hmanga online booking an kalpui chuan sawrkar hnathawk te pawh a huam vek tih a tarlang bawk.