Aizawl January 30, 2022 : Vawiin khan ZPM chhung inkhawm neih a ni a. He huna thusawitu ZPM Consultant W Chhuanawma chuan Mizoramah sawrkar lai ninna (anti-incumbency wave) avangin sawrkar lai thlak a ni thin a, tunah erawh sawrkar tha duh tak takna avangin thlak a ni dawn niin a sawi. 

W Chhuanawma chuan, "Ram mipui tam berte innghahna leh beisei awmchhun kan ni mek a, Congress leh MNF ni lo sawrkar hrim hrim, kalphung thara min kaihruaitu tur mipuite hian an duh tawh a ni. Party pahnih ten state kan nih hnuah kum 35 min kaihruai tawh a, ram chawikanna tur leh hmasawnna tura an tih theih tawk kan hre tawh. Mihring hi kum 35 kan tlin chuan kan puitling tawk viau tawh a, mahse vawiinah erawh nau sawngnawi ang maiin kan rumna ngaiah kan la rum reng a, thil danglam hmuh tur a awm lo. Mizoramah hian sawrkar lai ninna (anti-incumbency wave) avangin sawrkar lai thlak a ni thin a, tunah erawh sawrkar tha duh tak takna avangin thlak a ni dawn a, chutiang tur chuan ram mipuite kan insingsa mek a ni,” a ti. 

ZPM Consultant Chhuanawma chuan, "Malaysia atanga an inlak hran hnuah Singapore chuan engmah lo atangin bul an tan a, khawvel rin phak loh leh beisei phak lohin kum 35 chhungin ram ropuiah an indinchhuak thei. Corruption te pawhin nasa takin bu a khuar tawh thin a, mahse vawiinah chuan khawvela ram corrupt lo ber zingah an awm tawh. Hruaitu tha tak nen kalphung thar hnuaiah thawhrimna leh taimakna, thuawihna leh tanrualna hmangin ram thar an din a, tuna an dinnmun chu khawvelin a hria a ni. Singapore ang chiah hian Mizoram mamawh chu Sum ni lovin Thawhrimna a ni. Sum sem ni lo, thawhrimna hmanga ram tundin kan tum avangin ZPM hi mipuiten thlantlin an duh ve tawh a, hruaitu tha tak kan nei bawk. Kan Leader Pu Lalduhoma hian dik leh tha nia a hriatah chuan tlak pawh a huam a, a lamtangteah a buai ve ngai lo. Vawi tam tak a hlawhchham tawh a, mahse a policy hi a la ngai reng. A kaihhruaina hnuaiah ram hmel thar kan hmu tep tawh a ni,” a ti bawk.