ZALEN February 6, 2025 : Star Farm neitu Malsawmi chuan Aizawl DC thupek zawm lo ti a, an farm laka FIR an thehluh chu Court-in 31/1/2025-ah disposed order a chhuah tak avangin High Court lamah zualko a tum thu a sawi.

Chanchinthar lakhawmtute Aizawl Press Club-a a kawm naah Malsawmi hian Mizoram sawrkar Vety department lama mawhphurtu leh Mizoram Pig Farmers Association (MiPFA) te lakah dan anga hmala turin a inbuatsaih mek tih a sawi.

Star Farm chuan Mizoram-ah National Action Plan for ASF dan siam te a nih anga kalpui a ni lo an ti a, duh lai lai zawmin duh loh lai an zawm lo a, ASF hrileng kara inkaihhruaina hi sawrkarin buai nuaihin a kalpui an ti.

Dan lova sawrkar aiawhte an kal chuan a tuartu chu mipui anni an ti a, Mizoram sawrkar aiawh ten ASF chungchangah hian India National action plan / India ram constitution kalhin trade embargo an siam an ti.

Sawrkar chu Competition act 2002 kalhin mi eizawnna tichhe thei turin ASF test result lem (invalid test result) siam leh document lem thlenga theh darh a ni a ti a. Heng te hi India constitution zawm lohna a ni an ti bawk.

Malsawmi chuan Deputy Commissioner ten an huam chhunga vawk leh vawksa lakluh phallohna thuchhuah an siam ringawt chu India dan bawhchhiatna a ni a ti a, ASF lenna atanga vawk leh vawksa te phurhchhuah khap hi thil kalphung a ni a, A len lohna atanga vawk leh vawksa phurhluh hi khap theih a ni lo, niin a sawi.

Star Farm neitunu chuan a laka FIR thehluh anih avang hian DC pawh court-in a ko tih a sawi a, mahse, DC hi an inlan lo. Amaherawchu a laka FIR thehluh an disposed tak avanga court sang zawk kal thei dinhmuna an din tak avangin lawmawm a tih thu a sawi bawk.

Star Farm chuan vawksa an lakluh te hi sawrkar-in ASF len lohna hmun, ASF Free Zone a ti atanga dan zawma lalut an ni tih an sawi. India hian ASF avangin vawksa a insumdawn tawnna atana dan mumal takin a siam an ti a, Frozen vawksa hi ASF lenna hmun atangin a phurh chhuah theih lo an ti.