Aizawl; Academic session thar, 2023-24 atanga Mizoram sawrkar hnuaia sikul zirlaiten uniform inang tlang (common school uniform) an hman tur chu kaltlangpui a ni dawn a, uniform supply leh sem chungchangah sawrkar leh department lam an inrawlh dawn lo.

ZALEN zawhna chhangin School Education Director Dr. H. Lalthlangliana chuan 2023-24 academic session atanga uniform inang tlang hman tur chu ruahmanna lo awm tawh sa angin kaltlangpui tur a ni dawn tih a sawi a, ruahmanna lo awm tawh sa chu belh emaw, paih emaw awm loin kalpui a ni dawn tih a sawi. 

Aizawl District Education Officer-in thupek (order) a tichhuaha tar lan a nih tawh danin common school uniform hi sawrkar sikul (government school)-te bakah, adhoc aided sikul (sawrkar puihna dawng sikul)-te pawh hmang tura tih an ni a. Uniform-te chu sikulin an buaipui tur a nih thu leh uniform supply leh sem chungchangah sawrkar leh department a inrawlh dawn loh thu tar lan a ni.

Sawrkar school a zirlaite uniform chu primary school, middle school, high school leh higher secondary school-ah kekawr tlawn leh pawnfen rawng a inang dawn lo a, kawr (kamis) var leh pheikhawk dum vek tur a ni thung.

School t-shirt, bag, badge, necktie, kawrlum, kawnghren leh mawzate chu sikul mal duh thlan ang hman theih a ni ang.

COMMON SCHOOL UNIFORM
School      Kekawr/Pawnfen    Kamis
Primary     Dumpawl                   A var ban bul
Middle      Vutbuak                     A var ban bul
HS             A dum                       A var ban tlawn        
HSS           A dum                       A var ban tlawn