Aizawl August 4, 2022 : Vawiin khan Mizoram sawrkar chuan sum dinhmun chhiat chhan, hnathawk te hlawh pek theih loh chungchang te, sum harsatna lo intan dan te sawiin, CSS sum release dan sawrkar laipuiin a rawn thlak danglam chu harsatna an tawh chhan ber a nih thu an thuchhuah-ah an tarlang.

Sawrkar thuchhuak chuan, July ni 1, 2021 atangin Centrally Sponsored Scheme hnuaia sumte chu Public Financial Management System (PFMS) kaltlanga release zel an ni tawh a, Implementing Agency-te Single Nodal Account-ah an pawisa pawh dah zel thin tura tih a ni a, Mizoram sawrkar pawhin September 2021 atangin CSS sum te chu PFMS kaltlangin SNA-ah a dah lut ve ta bawk a, sum dinhmun a harsat chang erawh chuan dah luh nghal mai remchan loh chang a awm thin. Hetianga PFMS kaltlanga SNA-a sum dah luh te hi Central lamin a monitor (enzui) thei vek tawh a ni, an ti.

Sawrkar chuan July 2021 hnulama CSS sum lutte hi an kalpui tha viau an ti a, chutihrualin tunhma lama CSS sum dawn tawh, Implementing Agency hnena pekchhuah loh tam tak state engemaw zatah a la awm a, Heng te avang hian July 7, 2022 khan Central sawrkar chuan March 31, 2022 hma lama sum release-te chu Single Nodal Agency-te account-ah July ni 20, 2022 ral hmaa dah lut vek turin state zawng zawng a hriattir ta a, dah luh bangte chu Consolidated Fund of India-a refund turin a ti bawk. State Finance Secretary-te pawh meeting neih puiin a taka tipuitling ngei turin a hriattir hlawm a ni. Hetiang a nih avang hian Mizoram pawhin CSS fund March ni 31, 2022 hma lama dawn tawh, la release loh te chu a chhuah ta a, chawlhkar hnih chhung khan ₹ 610.69 crore zet a pechhuak hman a ni. Hun rei lo te chhunga hetiang zat a release avangin sawrkar sumin a daih loh a, Ways and Means Advance/ Special Drawing Facility hmangin RBI-ah sum a pûk a, hei hian a la daih loh vangin overdraft hmangin sum a pûk bawk a ni

Sawrkar thuchhuak chuan sum harsatna lo intanna dan tarlangin, Kum 2019-20 kum tawp lam atanga 2020-21 chhunga kan sum dawn tura ngaih dawn loh tam tak a awm a, a hlawm lian chin ringawt pawh ₹ 2632.58 crore lai a ni. Hemi nghawng hi kan la tuar mek a ni. Covid hri hluar vanglai niin, Central atang pawhin sum faia tanpuina te chu kan dawng ve bawk a; nimahsela, ₹ 100 crore pawh a tling lo. Covid hri leng hian ruahman lawk lova sum hmanna expenditure a tisang hle a, Covid damlo enkawlna atana kan damdawi in leh a thawktu neihsa ten dawl zo lovin Covid damlo enkawlna bik atan Covid Care Centre te, Voluntary Worker te, Test-na khawl install nan te, Test-Kit, re-agents leh PPE lei nan te leh Care Centre-a ei leh in buatsaihna atan te bakah hriat lawk loh ramri buai senso ah sum tam tham tak a kal bawk a ni. Hemi nghawng hi kan la tuar chho zel a, CSS sum te pawh duh anga hmaa release theih lo chang a awm fo a ni, an ti

Mizoram sawrkar thuchhuak chuan State dang te pawh a nghawng vek niin an sawi a, Tripura chu an harsa vak lo tiin RBI zawm ve lo Sikkim chu Government of India-ah an CSS sum chhuah kim lo te chu an refund a ngai, an ti. Assam pawhin a hunah hnathawk hlawh an pe thei lo an ni a, Nagaland leh Manipur phei chu keini aiin an dinhmun a chhe zawk niin an tarlang. 

Sawrkar dinhmun hi chhe viau mah se, Treasury chu khar em a ni lo an ni a, chutihrual chuan sawrkar sum chhuak nasa taka tihtlem a nih thu leh a tul zual tak tak chu Treasury atang hian pekchhuah a nih thu an sawi. 

Sawrkar hnathawk hlawh pawh pek thuai a nih tur thu sawiin, tun dinhmunah July thla hlawh chu pek theih a ni ta lo a, dinhmun khirh takah ding mah se, sawrkar chuan sum luh theihna dang dang te dapin Revenue earning department te pawhin an sum hmuh te Sawrkar account-a dah lut thuai tura tih an nih angin an chhung nghal zel a, heng te avang leh Central sawrkar atanga sum release thar tur leh realese mek PDRDG leh Share of Taxes lo lut tur te hre reng chunginsawrkar chuan a hnathawkte hlawh pek thuai a tum a, Muster Roll leh Work Charged-te hlawh phei hi chu August ni 5 hian chhuah nghal vek ni se a ti a, Pension leh Sawrkar hnathawk hlawh te pawh August ni 10 vel ah chhuah a tum bawk a ni. 

Sawrkar chuan CSS hnuaia hlawh la te tan harsatna a awm loh tur thu an sawi a, Central lamin CSS hnua hnathawk te hlawh tur hi a hun taka a release loh avangin state sum hmangin an hlawh tur hi an pek lailawk chang a awm fo zawk thin, an ti.