Aizawl February 2, 2024 : Vawiin hian Mizo Hnam Runah chhung inkhawm neih a ni a, hun hnihhnaah thusawitu K. Laldawngliana, MLA chuan ZPM sawrkar Pathian remruatah pawm theuh ang u. Congress tello leh MNF tello sawrkar tiin an inzuar a, MNF leh Congress atanga bang chuang si lote khan enchhin duhin an vote pui nasa hle niin a sawi.

Tuirial bialtu MLA chuan, "Tuna ZPM sawrkar hi Pathian remruatah pawm theuh ang u. Congress tello leh MNF tello sorkar tiin an inzuar a, MNF leh Congress atanga bang chuang si lote khan enchhin tiin an vote pui nasa hle a ni tih kan hria. Kan lo enchhin zel dawn a, a la reilo em a, sawisel leh puhmawh vak hun a la ni lo. A tak taka kalphung thar a awm leh awm loh chu Assembly Session hmasa berah kan la hmu dawn chauh," a ti.

"Assembly Session-ah khan opposition leh rulling bial kan thliar lovang an tih kha a lawmawm hle a, kan lo thlir zel ang a, kan tawngtai pui zel ang a, an sawi anga an awm loh erawh chuan kan nawr nek mai dawn a ni. Intodelna tura kalphung thar hi eng tak ni maw? beiseina sang tak nen mipuiin an thlir a. Chief Minister Adviser an dah teuh maite hi inrenchemna tura kalphung thar tha nge kan lo thlir zel dawn a, sawrkar thar hi tha taka ke pen zel turin duhsakna ka hlan a ni," a ti.

Dawngte chuan, "Dik tak leh rinawm tak, lawm chunga Lalpa leh kan ram rawngbawl tur hian ka theihna zawng zawngin ka rawn pen chhuak ve a, kei mi tlinglo leh fel lo tak hi Tuirial bial mipuiten chung lam remruatna ka tan a tihhlawhtlinna turin chanvo min pe ve a, lawmawm ka ti hle. MNF chu Hnam thuthlung kengtu a niin, martar-te thisena din, Mizo tawh phawt awmna tur a niin ka hria. Kan ram hi tluchhe vek, politician leh sorkar hnathawk zawng zawngte corrupt em em veka tuten emaw an puh hi chu thil diklo tak a ni tih ka sawi duh," a ti.