Aizawl April 9, 2024 : Mizoram Lok Sabha MP inthlan lo awm tur atan ZPM Party chuan tukin zing khan Hnahthial Bazar kawn-ah Street Campaign an nei a, He hunah hian ZPM Lok Sabha MP candidate Richard Vanlalhmangaiha chuan kuthnathawktute chawikan nan hma nasa taka lak a tum thu a sawi.

Richard Vanlalhmangaiha chuan, "Pathian leh mipuite zara MP atana thlan tlin ka nih chuan ramin hmasawnna rotling a neih theihna turin theihtawp ka chhuah dawn a, Mizoram sawrkar leh sawrkar laipui inkara indawrnaah leihlawnah ka tang dawn a. Mizoram chhung leh pawn lam tana tangkai thei ang berin hna thawk turin ka rawn pen chhuak dawn a ni," a ti.

ZPM MP candidate chuan, "Sawrkar tharah kuthnathawktute chawikan nan hma nasa taka lak a ni dawn a, tun lai thiamna leh khawl changkang zawk hmangin loneitute tana awlsam leh hlawk zawka thlai thar sawngbawl dante pawh ngaihtuah a ni zel dawn a. Chumi atan chuan sawrkar laipui hnuaia kuthnathawktute tana hamthatna awmte tun aia nasa zawka haichhuah kan tum dawn a ni," tiin, Hnam leh sakhua a him zel theih nan South Tuipui bial mipuite chu an vote hlu tak hmanga vote tling ngei turin a ngen nghal bawk a ni.