ZALEN August 21, 2024 : Assembly Session neih meka Hachhek bialtu Robert Romawia Royte zawhna a chhannaah Home Minister K. Sapdanga chuan tun sawrkarah Police 59 suspend an awm thu a sawi.

Suspend chhan tam ber chu duty laia zuruih vang a ni a, duty laia Zu in avanga suspend in an an dawt a, Discipline chhiat vang hrim hrima suspend an awm nawk a, Tang tichhuah avanga suspend mi pali an awm, Damdawi case avanga suspend an awm nual a, Kuhva tawlhruk-a inhnamhnawih te pawh an awm. Rukruk avanga suspend pathum an awm a, Roll Call kaihhnawihah - Roll call tlanbo leh kal lo bakah rui vang te an ni hlawm.

Suspend zingah hian Constable an tam fal hle a, Naik panga awmin Havilder pathum an awm a, Head Constable pakhat awmin ASI pathum an awm a, Inspector pahnih an tel bawk. 1st Bn. MAP chu Batallion zinga suspend tamna ber an ni a, Aizawl DEF chu DEF zinga Suspend tamna ber a ni. Lawngtlai DEF, Lunglei DEF leh Hnahthial DEF atangin suspend an awm lo.