ZALEN February 7, 2025 : Mizoram Pradesh Congress Committee chuan vawiin khan Congress Bhavan, Aizawl-ah Friday Political Session leh Lawmluh Programme an hmang a, President Lal Thanzara chuan lawmluhna a nei a, sawrkar mek te hian an sawrkar theih nan dawt leh thutak chanve nasa takin an sawi thin a ti.

Lal Thanzara chuan, "Duhtlanna siama Congress lo zawm te hian an tihsual ka ring lo. Politics hi Pathian rawngbawlna pawimawh tak a ni a, Pathian rawngbawlna a ni tih hre lova miin hma a lak a, politics tuinua inchiah a, diklo taka ram kaihhruai anih chuan politics ngaihven duh lo inti emaw, ngaihtuah lo inti te pawh politics kal sual chuan a hrut tel ve dawn tho tho. Politics hi Pathian rawngbawlna a ni tih hriaa, a dik theih nan hmalak a ngai a, ngaihven ve chin neih a ngai a, politics tuinuah kan inhnimphum ve kher a ngai lo," a ti.

Congress President chuan, "Thufingte 29:12 ah chuan 'Roreltuin dawt thu a ngaihsan chuan, a chhiahhlawhte zawng zawng an sual thin' a ti a. Tun sawrkar ah hian dawt thu kan hre hnem hle mai. Tun sawrkar mek hian an sawrkar theih nan dawt leh thutak chanve nasa takin an sawi a. Zokhua a kuthnathawktute pawhin an thusawi awihin an thlai thar leh sawhthingte an leisak duh ringin an vote ruih ruih a ni."

"Roreltu in dawt a ngaihsan chuan a chhiahhlawhtinte chuan an sawi mai thin a, he thil hi kan tawng mek a, kan tawng chhunzawm zel ang tih ka hlau khawp mai," a ti bawk.

Mizo Kristian, Kohhran mi kan nihna angin politics ah pawh hian eng party ah hian nge kan awm ang tih hi kan chhut a ngai a ni. Ringtu, Kohhran mi sakhaw zalenna chawinun duhtu, chanchintha dodal ve lo, BJP sum hmang ve lo kan nihna angin he party kaltlang hian kan ram, kan hnam, kan sakhua a him nan hna i thawk ang u.