Aizawl September 26, 2022: ZPM chhung inkhawm vawiina neihah ZPM Consultant PL Liandinga chuan thusawina hun a hmang a, Kalphung thara kal chu thil harsa a ni lo tiin, tuna sawrkarin a tih tam tak hi ti ve lo ringawt pawh ni ila kalphung thar a nih mai thu a sawi. 

PL Liandinga chuan, “Sawrkarna chang turin kan inbuatsaih a, Pathian leh mipui zarah sawrkarna chan ngei pawh kan inring a, kan sawrkar chuan kalphung tharin kal kan tum ang tih chu kan hre vek. Kalphung thar hi a harsa lo va, tuna kan sawrkarin a tih tam tak hi ti ve lo ringawt ila kalphung thar chu a ni mai. Mipuite hlawkpui chuan loh tur - Mau te, kawngchhawng te, leiverh te, nuai 3 (thum) sem te, board siamchawp enkawlzui loh te bakah thil dang tam tak, mipui pawisa hekna tur tihbo a ni tur te pawh kalphung thar a ni,” a ti.  

ZPM Consultant chuan, “Kamrul-a leh Pu Zoramchhana tel lohna sawrkar, restricted tender ringawt hmanga rorel lohna sawrkar hi mipui tan hian hmuh chakawm leh kalphung thar a ni thei. Heng thil hnawksak awmsa tih chhunzawm loh bakah, tunhmaa Mizoram sawrkara la awm ngai lo, Chief Minister-in works department lian a chang lo tur te, Val Upa Council uapna hnuaia sawrkar a kal tur te, ZPM sawrkar chhunga MLA hlawh a pung lo tur chiangsa te, Chief Minister leh Minister te motor kawl tih tlem te pawh kalphung thar nasa tak a ni dawn. Thlai thar leina budget-a a awm tur te, khaw hrang hranga Village Development Council din tur te, MLA/Minister te mimal car tur sawrkar-in a lei tawh lo tur te, heng zawng zawng kan tih a, dikna nena ro kan rel chuan Mizoram hi a thawveng sawt ngei ang,” a ti bawk.    

Liandinga chuan, “Kan inbuatsaihna atana pawimawh tak tur chu rinawm tura in Baptist hi a ni a, rinawmna nena kan tih si loh chuan kalphung thar hian awmzia a awm lo thei a ni. Kalphung thar chhungphum pawimawh ber tur chu sum ngainat lutuk loh tum phawt a ni a, sawrkarna kan lo chang ve a nih pawhin kan hotute hian sum hi ngaina lutuk lo sela, kan workers zawng zawng leh kan pawl khaidingtu te hian sum hi ngaina lutuk lo ila a tha hle ang. Kan sawrkar hrawn tawh te hi demna kan nei a nih chuan a bul chu sum ngainatna deuh vek a ni a, hemi lakah hian insum turin kan inchah a ni,” a ti bawk.