November 8, 2022; Mizoram (Liquor Prohibition) Act, 2019 (MLP Act) hnuaiah grape wine rules peih fel a ni tawh a, Mizoram sawrkarin hriattirna a tihchhuah a tarlan a nih danin, Mizoram chhunga grape wine siamchhuah te chu alcohol za zel a 10 (10%) chin awm a phalsak dawn. Hetihlai hian excise duty (chhiah) lak zat tur pawh tihfel ni tawhin, litre khatah Rs 10 zel lak a ni ang.

Mizoram sawrkarin kar kalta Zirtawpni, November 4 a hriattirna a tihchhuah a tarlan a nih danin, Mizoram Liquor (Prohibition) Rules, 2022 tlawhchhanin, Mizoram sorkar chuan Mizoram chhunga grape wine siamchhuahte chu alcohol za zela 10 chin awm a phalsak a. Hei hi za zela 2 aia tam emaw tlem zawk emaw thleng phalsak a ni. Hetihlai hian dan thar hman hma a grape wine siam chhuah ah alcohol 11% a awm thin nia thudawn a ni.

END-in October 6, 2022-a notification an tihchhuahah, military leh para-military ten zu an lak luh atanga chhiah lak zat tur pawh tarlan tel a ni a, zu litre khatah Rs 60, wine litre khatah Rs 40 leh beer litre khatah Rs 10 lak a ni dawn.

August 31, 2022-a chief minister Zoramthanga hoa thukhawm Council of Minister chuan, Excise & Narcotics department (END) atanga lut, The Mizoram Liquor (Prohibition) Draft Rules an ngaihtuah a, sawiho hnuah an pawm. END chuan Rules chu hman tan theih turin September 7, 2022 khan notification a chhuah.