ZALEN March 19, 2025 : Mizoram Universal HealthCare Scheme (MUHCS) tlangzarhtu Chief Minister Lalduhoma chuan health care scheme thar tlangzarh takah hian registration ti vek turin mipuite a ngen a, mamawh tak tak ten an tih thin loh avanga buaina an tawh thin chu hei hian a chhawk ngei a beisei thu a sawi. Financial year hman mekah health care bill ba nei lovin kum an khar dawn a ti bawk.

Lalduhoma chuan kumin financial year-ah health care bill ba crore 13.5 a la awm tih a sawi a, vawiin khan Finance department chuan hemi rulhna tur hian Crore 14 an pechhuak tih sawiin health care bill ba awm lovin sawrkar kumthar an chuangchhuak thei dawn a ti.

Chief Minister chuan a bial chhunga mi ngei damdawiina awm ten an pur thin tih a sawi a, health care an tih leh tih loh an zawt a, an lo ti lo thin a, anmahni zawk hian an lo ti lo hi pawi an ti em em thin a ti a, chuvangin Mizoram khua leh tui te chu MUHCS ti vek turin a ngen a, Cheng nuai 5 thlenga damlo inenkawlna bill theih a nih avangin registration Rs. 2,500-a ti ngei turin a duhsak thu a sawi.

Health care scheme a inziaklut tur hian thla thum chhung hawn ang a, online leh offline hmangin inziahluh theih a ni dawn a, May 2025 thleng inziahluhna hun hi hawn a ni ang. May 2025 ral hmaa inziaklut ve hmanlo emaw inziaklut remchanglo te tan July 2025-ah Grace Period thla khat dan hawn leh tur a ni a, inziahluh man erawh 50% in a sang thung ang. Offline a inziaklut tur tan sub-centre-ah inziahluh tur a ni.