September 8, 2022; Mizoram sawrkar chuan kum kal mek 2022-23 chhungin Auction of State Development Loan hmangin Rs. vbc. 540 a puk tawh a, hetihlai hian sawrkarin leiba a neih mek zat hriat theih chinah 2020-21 (actuals) chu Rs. vbc. 9881.09 a ni.

Vawiin Assembly session a Lalduhoma zawhna Finance minister Zoramthangan ziaka a chhan danin, kumin kum kal mek 2022-23 ah hlawm li in Auction of State Development Loan hmangin sum puk a ni tawh a, 24.5.2022 ah Rs. vbc. 150 puk niin, 21.6.2022 ah Rs. vbc. 100, 19.7.2022 ah Rs. vbc. 90 leh 2.8.2022 ah Rs. vbc. 200, a vaiin Rs. vbc. 540 puk a ni tawh. Kum kal ta 2021-22 chhung khan Rs. vbc. 747 a lo puk tawh bawk.

Finance minister chhanna a alan danin, State Development Loan interest chu a punna yield percent angin auction a nih tuk atanga chhiar tanin half yearly a a interest hi pek thin a ni a, a principal amount erawh a tenure a pumhlum hun, a mature niah a hlawma rulh thin a ni.

Mizoram sawrkarin leiba a neih mek zat (actuals) chu financial year kum 2020-21 chin bak hriat theih a la ni lova, FY 2020-21 (actuals) chu Rs. vbc. 9881.09 a ni.