Aizawl: Mizoram sawrkar chuan Federation of Mizoram Samagra Employees (FEMSE) te chu an nawrh titawp turin a hriattir a, nawrh an huaihawt mekah hian 'no work, no pay' hman a tum. Hetih lai hian FEMSE lam chuan lungawiloh lantir nana a huhoa chawlh an lak chu chhunzawm zel an tum thung.

Nimin chhun dar 12 khan Human Resources Development Board Vice Chairman L.Thangmawia MLA chuan press mite a kawm a, FEMSE ten a huhoa November 21,22 leh 25 ah te chawlh an la thut chuan sawrkar a barakhaih thu sawiin hemi thuah hian sawrkar chuan vawiin ni thlengin official in a la dawng lo niin a sawi.

L.Thangmawia chuan, "SSA leh RMSA te Samagra Shiksha a chhunfin an nih hnuah thawktute hlawh central in a rawn tihniam a, matching share 10% bakah a hmaa an hlawh zat an lak theih nan kumtin Mizoram sawrkar chuan vaibelchhe 27 a sen belh a. Naupangte exam lai mek leh exam tur awm laia hetianga naupangte hmakhua tihchhiat pawisa lova an lungawilohna hnaa an lantir hi sawrkar tan pawm zam theih a ni lo a, sawrkar chuan no work, no pay a kalpui dawn a ni," a ti a. School thuneitu te chu zirtirtu kal leh kal lo nitina report turin an hriattir tih a sawi.

FEMSE ten an thilphutte sawrkarah an la thlen lo nia sawiin thlen pawh nise tun dinhmun ah chuan Gauhati High Court-ah thubuai a awm mek avangin sawrkar tan thutlukna engmah siam theih a ni lo niin a sawi a. Samagra hnuaia thawktu te dinhmun pawh tun aia ziaawm deuha siamthat pawh sawrkarin a duh nia sawiin chuti rum ruma thil tih theih a ni lo tihsawiin, "November ni 25,2019 atangin an hna chhunzawm vek turin zirtirtu zawng zawng kan hriattir a, sawrkar hriattirna zawm lo te chu a tul angin action lak a ni ang," a ti bawk.

Hetih lai hian Federation of Mizoram Samagra Employees hruaitute chuan a huhoa chawlh an lak chu Thawhtanni ah pawh kalpui chhunzawm zel an tum tih Zalen palai an hrilh a. Thawhtanni hian Council meeting neih a, an kal zel dan tur chu rel leh an tum niin an sawi bawk. School Education Minister in an chawlh chhan engmah ziaka dawn a la nei lo nia a sawi chungchangah FEMSE hruaitute chuan September ni 19,2019 khan Minister hi a kutah an pe ngei niin an sawi thung.

FEMSE member hi primary zirtirtu 550, middle school zirtirtu 1643, high school zirtirtu 93 leh higher secondary zirtirtu 6 an awm a ni.