July 20, 2022; Mizoram sawrkarin National Health Mission (NHM) hnuaia thawk, tiamchin awm lova a huho a chawlh la mekte chu ban an nih lohna chhan tur ziaka ni thum chhunga insawifiah tura a hriattirna (show cause notice) chu hnuhkir a ni. 

Media hrang hranga tarlan tawh angin, NHM Mission director chuan June ni 16, 2022 khan NHM hnuaia hnathawk, a huho a chawlh la te chu ‘show cause notice’ pein, July 11-13, 2022 chhung phalna nei lova casual leave late leh chumi hnua indefinite strike NEUM-in a huaihawt thlawpa hna zawm lote chu Mizoram Essential Services Maintenance Act, 1990 (as amended) Section 4 & 6(1) bawhchhia an ni tih hriattirin, hna a an luh dawn a an intiam tawhna (agreement deed) para 3(3) angin bân theih leh kum khat thleng tantir theih an nihna bakah, Rs. 2,000 chawitir theih an ni tih a hriattir a ni.

Mission director chuan NHM hnuaia hnathawkte chu a rang thei ang bera an hna zawm tur leh an hna atanga ban an nih lohna chhan tur ziak a, ni thum chhunga a hnena insawifiah turin a hriattir bawk.

Mizoram sawrkarin show cause notice a hnuhkir nachhan hi NHM hnuaia thawk ten nawrh titawp a hna an chhunzawm vang niin, an nawrh chungchangah Central YMA chuan palai hna an thawk a, July ni 17 khan deputy chief minister Tawnluia, health minister Dr. R. Lalthangliana leh hotu dangte kawmin, NHM a thawkte nawrh chungchang an sawipui a, sawrkar hotuten NHM a thawkte thil phutah hmalak nghal a nih tur thu Central YMA hruaitute hnenah an lo sawi avangin NHM Employees Union, Mizoram (NEUM) chuan July 18, 2022, Thawhtanni zing dar 9 khan nawrh an titawp a ni.