Aizawl September 7, 2023: August 31, 2023 khan Drugs Controller General, India (DCGI) chuan Central leh State-tin Drugs Controller-te hnenah damdawi lar tak pakhat Digene Gel chungchangah thuchhuah a siam a. He lehkha chhuak hi mipui chiai phahna tur a ni lo va, damdawi tha lo ei palh a awm lohna tura fimkhurna thu a ni a. Thil awmdan chu hetiang hi a ni e.

Digene Gel siamtu Company - Abbott India Ltd., L-18/19, Verna Industrial Estate, Salcette, Goa - 403722 chuan DCGI hnenah Digene Gel an siam, hmun hrang hranga an hralhchhuah tawh chu batch pakhata complaint a awm avangin Digene Gel (Mint, Orange leh Mix fruits flavour) batch zawng zawng an kohkir (recall) thu leh, siamchhuah pawh an chawlh rih thu an hriattir a.

Hei hi damdawi siamtuten company atanga damdawi an hralh chhuah tawh, complaint awm leh hnuhnawh avanga an kohkir leh dan pangngai a ni. Central leh State Drugs Regulator-ten an hmuhchhuah hmaa hetianga hma an lak hi dan laka an him theihna a ni bawk.

DCGI chuan Central Zone & Sub-Zone Regulator leh State Drugs Controller-te hnenah he thu hi a hriat chhawntir nghal a. A hmangtu tana pawi a awm palh loh nan mipuite chu he damdawi hmang chhunzawm lo turin a chah a. Central & State Drugs Regulator-te pawh Digene Gel, Abbott India Ltd., Goa Plant siamte kohkir an nih anga enzuia bawhzui tur leh, sample test tura hriattir an ni bawk.

Doctor leh healthcare professional-te chu fimkhur tura ngenin, an damlo hetiang damdawi eite dinhmun thlir zuia, Adverse Drugs Reaction a awm em tih ngaihven zui turin a ngen bawk.

Chuvangin, Mizoramah Digene Gel, Abbott India Ltd., Goa Plant siam reng reng chu ei zui loh tur a ni a, damdawi zuarte pawhin hralh chhuak lovin, Stockist/Manufacturer-ah a rang thei ang berin an thawnkir tur a ni.

Digene hi a tui (gel/liquid) leh tablet anga siam a ni a. He DCGI hriattirna hian Goa Plant atanga Digene Gel a kawh bik avangin, Abbott India Ltd., hmun danga siam a huam lo va, tablet form-a siamte chu a huam lo bawk ang.