Aizawl May 18, 2023 : MNYF Vice President Zodinpuia chuan MNF chu Mizo Nationalism lungphum hmuchhuak tu, vawnghim rengtu a nih avangin kan ram leh hnam himna MNF chuan a dah pawimawh hmasa ber a, political party dangte anga sawrkarna chan ringawt hi MNF dinchhan leh tum a ni lo, a ti.

Mizo National Youth Front (MNYF) Headquarters'-in Aizawl North III, Aizawl East II, Aizawl South II, Aizawl North II leh Aizawl South I Block an tlawhchhuah naah Zodinpuia chuan, "MNF hi thalaite din leh Martar-te thisen in a bual a ni a. Pu Laldenga kha MNF President a nih in kum 34 mi chauh a ni. Chief Minister zahawmtak Pu Zoramthanga hi MNF Vice President a nih khan kum 35 mi chauh a ni bawk a ni. MNF hi Mizo Nationalism lungphum hmuchhuak a, vawnghim rengtu a nih avangin kan ram leh hnam himna MNF chuan a dah pawimawh hmasa ber a, political party dangte anga sawrkarna chan ringawt hi MNF dinchhan a ni lo," a ti.

MNF thalai Vice President Zodinpuia chuan, "MNF sawrkar chuan  thalai leh zirlaite hmasawnna turin nasa takin ke a pen a, zirna leh thalai infiammite tan MNF sawrkar hian bungthar min kaipui tawh a ni. Sawrkar hmasa lama mipuite sawisel ber Mizoram kawngpui chhia chu MNF sawrkar hnuaiah nasa taka thlakdanglam in a lo awm ta a, power-ah kan hnianghnar a, Gas leh Buhfai ah kan hnianghnar bawk a. India ram state dangin an kalpui theihloh ni 100 ah ni 100 inhlawhna pawh Mizoram ah chuan kalpui theih bik a ni," a ti. 

Kuthnathawktu ten SEDP cheng nuai 3 an dawntlin ngei theihnan sawrkar chuan instalment-a tanpuina sem chhoh zel a tum a, tunah hian chhungkaw 120000 te hnenah SEDP tanpuina a thlengkim dawn tawh a, SEDP pilot project atangin chhungkaw 300 dawn chuan cheng nuai 3 an dawng tawh a ti bawk.

MNYF Vice President chuan, 2023-a Mizoram inthlanpui lo awm turah eptu party te atanga MNF elpha tur an la awm loh avangin MNF chuan nghet takin sawrkarna a siam leh ngei dawn niin a sawi a. Mizo hnam thuthlung a din MNF danglamna chu Mizoram mipui mai ni lo, Myanmar, Bangladesh leh Manipur lam unaute pawhin an hmuin an hria a ti a. Ramdanga awm Zo hnahthlak unaute harsatna tawhah MNF chuan inkuangkuahin a thlirliam mai lo a, Chief Minister Zoramthanga hmalakna in sawrkar chuan theihtawpin a pui a, India sawrkar-in a remtilo chungin raltlante pawh thlamuang takin Mizoram ah an khawsa mek a ti bawk.