Aizawl: State Bank of India thuchhuah chuan tun hnai hian mi sualten Internet Banking/ online Banking hmang in account nei te kawng hrang hrang a bumin an account-a pawisate an ruksak thin tih an sawi a, mi sual chet dan chi 5 thuchhuah siamin an tarlang.

Hetiang inbumna hi Mizoramah pawh thleng tawhin nuai 2/3 mai ni lo, nuai 10 chuang bumte pawh an awm tawh niin thudawnna dang chuan ZALEN a hrilh.

SBI thuchhuah tar lan danin playstore atanga Application download turin an ti a, hemi hnu hian an mobile khawih lai reng kha remote-in an rawn control thin a, account details leh ATM details online-a submit turin an rawn dil thin bawk a, hetiang ti lo tur hian mipui an ngen a ni.

“SIM card thi tur leh mobile bill pek loh chhuan lamin pek dan tur link leh application install tur an hrilh thin a, hei bakah hian KYC online-a submit turin, Aadhar number, Voter ID etc. an rawn dil thin bawk a. A dang lehah chuan account KYC update/mobile No/ PAN number etc update nan a hnuaia link ah hian lut rawh tih SMS-te an thawn thin bawk,” tiin an tar lang a ni.

Password, PIN number, ATM Card detail leh thil pawimawh dang laksakin mi pawisa an ruksak thin tih sawiin hetiang laka kan him theih nan, Bank account details hrang hrangte phone-a hrilh lo turin Account neitute an ngen a. SBI pawhin an customer te phone a biak chang an nei thin tih sawiin; mahse, phone a details hrilh turin an ti ngai lo va, thil tulte kenga Branch a kal turin an hrilh zawk thin tih an sawi bawk a. Account a lo him zawk nan, Branch a finfiah zel chu a finthlak ber tih sawiin, Phone Call leh Whatsapp hmanga account details te lo pe lo hram turin mipuite an ngen a ni.