ZALEN February 16, 2025 : Nimin khan State Bank of India (SBI) Managing Director Vinay M Tonse, Mumbai atanga Mizoram tlawh chuan infiamna bungrua, Rs. nuai 25 man hu chu Minister of Sports & Youth Services Lalnghinglova Hmar hnenah a hlan.

Tonse hian sport bungruate hi Corporate Social Responsibility (CSR) hnuaia pek a nih thu sawiin, tangkai taka Mizo infiam miten an hman theih nan duhsakna a hlan.

Mizoram Youth Commission (MYC) Chairman Malsawmzuala Ralte hnenah bus (20 seater) a hlan bawk a. Bus hi Rs. 25,47,759 man a ni.

Lalnghinglova Hmar chuan Olympic 2036 hmachhawp an neih mek laia hetianga infiamna bungrua SBI-in an pek vang hian lawmthu a sawi a. Mizo thalaite tana din, MYC-ten bus an dawn thu-ah lawmthu a sawi bawk.

Tonse hian SBI Main Branch atangin virtual-in hmarchhaka SBI branch thar pahnih a hawng bawk a. Chanchinbu mite nen interaction inkawmin an chungah lawmthu a sawi.

SBI Managing Director nupui Namita Tonse chuan Ferrando Children’s Home, Durtlang tan puanthui zir nan a khawl, Rs. 2,75,000 hu a hlan a. Women empowerment tihchak nan Social Welfare Dept hnenah Rs. 2,20,000 a hlan bawk a. Hei hi SBI Ladies Club hnuaia Corporate Social Responsibility (CSR) fund atanga pek a ni.

Tonse-a hian Mizoram kal a tumna a rei tawh a. A chhungte hi tun hmain SBI Tlabung-ah an lo thawk tawh a, Karnataka lam mi a ni a, Mizo IPS hmasa thenkhatte nena inthenawm leh innel an ni a. Hemi zarah hian Mizoram tan CSR pawh a pek phah nual a, Covid lai tih lohah chuan CSR an hmuh tam ber tum niin hriat a ni.