Aizawl; Supreme Court Judge leh National Legal Services Authority (NALSA) Executive Chairman ni bawk Justice Uday Umesh Lalit chuan nimin khan Rawpuichhipah mipuite dan leh hrai chungchanga inhrilhhriatna Legal Awareness Campaign a hmanpui a. Gauhati High Court Judge pahnih – Justice Michael Zothankhuma leh Justice Nelson Sailo ten an tawiawm a ni. 

Court sang ber Judge nilai mek Justice Uday Umesh Lalit chuan a thlawna dan chungchanga inpuihna legal aid dawn chu Ram Danpuiin khua leh tuite dikna leh chanvo a pek constitutional right a nih thu a sawi a, hei hi mitin hnena thleng phak ngei tur a ni a ti a. Hemi kawngah hian Legal Services Authority te hi an pawimawh a, hetiang Campaign kaltlang hian mipuiten dan hnuaia an dikna leh chanvo dik dak an hre thei a ni, a ti. 

Supreme Court Judge chuan Central sorkar leh state sawrkarten ruahmanna an siamah te hamthatna dawngtu turin an dawng ngei em tih te, hemi kawngah harsatna an nei em tih en leh finfiahte pawh NALSA huang chhungah a tel thu a sawi lang bawk a ni.  

Julie Lalrinzami, Chief Judicial Magistrate Aizawl leh Secretary, District Legal Services Authority, Aizawl ni bawk chuan The Mizo Marriage, Divorce and Inheritance of Property Act, 2014 chung-chang a hriattur pawimawh te, social media in a hrinchhuah inpuh hmingchhiatna a pawi theihziate leh a hremna chungchangte leh kumtlinglote chunga mipat hmeichhiatna lam hawi pawikhawihna leh hleihlenna a thlen a dan hman ber POSCO Act, 2012 chungchang leh a hremna nat zia te sawiin zirtirna hun hmang a ni.