ZALEN July 8, 2025; Ministry of Tribal Affairs chuan, July ni 7, 2025 (Thawhtanni) khan Financial Year 2023-24, 2024-25 chhunga Scholarship la sem loh Rs. 50,42,81,000/- sanction order chhuah a ni a, Zirlaite'n a rang thei ang bera an dawn theih nan MZP chuan a tul angin hma a la chhunzawm zel dawn.

MZP chuan, Scholarship chungchangah hian theihtawp chhuahin hma a la a, Governor kaltlangin Ministry of Tribal Affairs lam hotute pawh lehkha pek tawh niin, Delhi -ah Ministry of Tribal Affairs lam hotute pawh MZP hruaitute chuan hmuin an zuk bawhzui tawh a, Richard Vanlalhmangaiha, MP (Lok Sabha) pawh sawipuiin theihtawp a chhuah mek thu MZP hruaitute a hrilh hnu lawkah a hlawhtlinna hmel hmuh a ti hi MZP chuan lawmawm a ti hle.

MZP chuan zirlaite harsatna hria a theihtawp chhuah a, Post Matric Scholarship la dawng lo zirlai 5000 chuang te tan theihtawp chhuah tute chungah MZP chuan zirlaite aiawhin lawmthu a sawi a, FY 2024-25 pawh a rang lama sem vat a nih theih nan a hma la nghal turin Mizoram Scholarship Board(MSB) lam hotute pawh ngen nghal a ni.

#ZalenNews