ZALEN March 12, 2025 : Science Teachers Association Mizoram-in hun rei tak kan lo aupui tawh, Parliament Budget Session neih mekah K. Vanlalvena, MP (Rajya Sabha) in National Institute of Technology (NIT) pawimawhna hria a, NIT Mizoram-in harsatna a tawh Parliament House-a sawichhuak chu lawmawm an ti a. Permanent Campus dinna kawngah pawh chak taka hma lak chhoh a nih theih nan rahtha a chhuah ngei an beisei tih thuchhuah an siamah an tarlang.

STAM chuan Engineering College pangngai ang ngawt ni lo, India sawrkarin a bik taka a enkawl NIT hi tunah hian India ram pumah 31 chauh a awm a. NIT Mizoram hi kum 2010 daih tawha din ni mah se, thuneitu ten an ngaih pawimawh tawk loh thin avangin a dinhmun hi a la tlabal-in a din rualpuite a pha lo nasa hle a. Lengpuia an Campus tur Forest Clearance chungchangah buaina a awm avangin, building sakna tur leh infrastructure siamna tur sum, cheng vaibelchhe tel teh meuh hman theih lovin hun rei tak a tang mek a, he harsatna pawh Sawrkar hmalakna in sutkian chhoh mek niin an hria, lawmawm an ti.

NIT, Zirna In changkang leh tha tak kan neih thuai theih nan STAM chuan theih ang angin hma a la thin a, hemi kawnga Member of Parliament (Rajya Sabha)-in hma a lo lak tawhna leh aupui tawhna te an thlawp a, NIT tha neih hlutna leh pawimawh zia hi thuneitute leh mipui hian hriain, Campus dinna kawnga harsatna awm hrang hrang te sut kian thuai a nih theih nana chak taka hmala turin STAM chuan thuneihtute an ngen a ni.