SEC chuan Sawrkar atangin inthlan rawtna a la dawng lo

Aizawl: SEC chuan Aizawl Municipal Corporation inthlan hun tak chu hriat a la hre lo a. Hetih lai hian inthlan lo awm tur atan political party hrang hrangte chu an inpeih tawh thung.

State Election Commissioner Laima Chozah chuan AMC inthlan hun tak chu a la hriat theih rih lo tih leh sawrkar atangin inthlan rawtna a la dawng lo tih Zalen a hrilh a. “Tunlai hian roll revision kan buaipui mek a. Covid-19 hi vantlangah a darh mek niin a lang a, Village council leh Local council kan inthlang tawh a, inthlan vanga hri kai an awmin nuam kan ti lo a, hemi avang hian boruak kan thlir reng a ni, kan dinhmun ngaichang chungin sawrkar nen kan inrawn hnuah chauh thutlukna kan siam thei ang,” a ti.

AMC term chu pawhsei theih a nih leh nih loh zawhna chhangin SEC Commissioner chuan, “Sawrkar thu thu a ni a, a duh chuan a pawtsei thei a ni,” a ti a. AMC inthlan atan hian MLA electoral roll chu mother roll-ah an hmang dawn niin a sawi bawk.

Aizawl Municipal Corporation inthlan lo awm tur atan hian political party hrang hrangte chu an inpeih tawh niin an sawi a. MNF general secretary T.Liansiama chuan boruak a that chhoh zel a, inthlan hi sawn loh theih loh a nih loh chuan chuan a hun taka inthlan chu an party duh dan a ni tih a sawi a. “AMC inthlanah hian kan rawn thawhpui ang che u ti an awm chuan hnar thu a awm lo a, chutiang a nih lem loh chuan a mala chuh kan tum a. Candidate tur kan la tifel chiah lo a, seat zawng zawng chuh kan tum a ni,” a ti.

MPCC media cell chairman Dr. Lallianchhunga chuan AMC atan hian an inbuatsaih thu leh candidate tur pawh an tihfel tep tawh thu Zalen a hrilh a. “Thil thar a awm a nih loh chuan thawhpui nei lova a mala chuh turin thutlukna kan siam a. Inthlan chungchangah chuan mipui himna leh an hriselna hi kan ngai pawi-mawh ber a, a hun taka inthlang turin kan inbuatsaih mek a ni,” a ti.

ZPM secretary general PC Vanlalruata pawhin an party chuan thawhpui neih an tum lo niin a sawi a. “Kan candidate tur hi 100% chuan kan la tifel lo deuh a, Ward 2/1-ah kan la final lo a. Inthlan chungchangah hi chuan a hun ngaia inthlang turin kan party chu kan inpeih a, tunlai hri leng vanga sawrkarin inthlan hun sawn a tum anih pawhin kan party chu kan tang tung lem lo a ni,” a ti.

People’s Conference party Vice President Lalrinzuala Chawngthu chuan inthlan chuh tumin hma an la chho tan niin Zalen a hrilh a. “Thawhpui kan neih dawn leh dawn loh te, chubakah party thar kan nih avangin Ward zawng zawng kan chuh dawn em tih a la hriat loh a.”

“Kan hri leng avang hian November-a inthlan hi a him ang em tih hi ka mimal ngaihdan a ni a, party ang chuan la sawiho chiah lo mah ila kumthar lama inthlan neih hi a fuh zawk mai ka ring deuh a ni,” a ti bawk. Tuna AMC hi November 26, 2015 khan thlan a ni a, an term hi December 10, 2020 hian a tawp dawn nia thudawn a ni. Kum 2015 inthlanah khan MNF chuan seat awm 19 zinga seat 11 an la a, Congress leh MPC tangrualin seat 8 lain ZNP leh BJP ten seat lak an nei lo thung. AMC-ah hian hmeichhiate tan seat 6 hauh (reserve) a ni a, inthlan hnuhnung berah khan reserve seat 6 zinga 5 hi Congress-MPC ten an la a, MNF-in seat 1 an la thung.

State Election Commissioner chuan Lai Autonomous District Council inthlan phalna chu Governor-in a pe tawh niin Zalen a hrilh a. “Inthlanna atana electoral roll hi October 29 hian peih (publish) kan beisei a. Tun dinhmunah Lawngtlai lamah hian Covid hi hmun dang ai chuan a ziaawm deuh niin a lang a, sawrkar nen inrawnin boruak a muanawm nia kan hriat chuan inthlan hun hi puan theih mai kan in beisei a ni,” a ti bawk.