Aizawl: February ni 16, 2021-a Aizawl Municipal Corporation inthlan loawm turah State Election Commission chuan MCC bawhchhiatna complaint 1 a dawng tawh a. AMC inthlana vote tlate hi Pachhunga University College-ah chhiar a ni dawn.

Zalen-in State Election Commissioner Laima Chozah IAS hnen atanga thu a dawn danin BJP chuan Sport & Tourism Minister Robert Romawia Royte hmalakna chung changah complaint an thehlut a, an thu thehluh hi District Municipal Officer, Aizawl DC ni bawk hnenah lo bawhzui turin an thawn niin a sawi a. BJP atanga complaint an dawn bak hmun dang atangin complaint dawn an nei lo niin a sawi.

Inthlan avanga hripui darh thei chungchangah SEC chuan theihtawpin mipui himna atan hma an la dawn nia sawiin Laima Chozah chuan, “Inthlanna ah hian mipui dinna tur rin vek kan tum a, sanitizer kan dah vek dawn bawk a. Polling station pakhatah hian voter 1,000 bak awm kan phal lo a, hetiang SOP kan siamte kan zawm thei a nih chuan hri darh thei lakah pawh kan fihlim theih kan beisei ni,: a ti bawk.

Laima Chozah chuan inthlanna atan hian EVM hman tum a nih thu leh VVPAT erawh hman a ni dawn lo niin a sawi a. Vote thlakna hmunah hian cadidate te hming, party leh symbol chu A-3 size-in tar vek an tum niin a sawi bawk.

State Election Commission (SEC) chuan Aizawl Municipal Corporation (AMC) inthlan hun atan hian February 16, 2021 (Thawhlehni) an ruat a, vote hi zing dar 7 atanga tlai dar 4 inkarah thlak a ni ang. AMC inthlana vote tlate hi Aizawl DC strong room-ah dah tur a niin February ni 18,2021 zing dar 10 atangin Pachhunga University College campus-ah chhiar a ni dawn a. Vote tla te hi dawhkan (table) 19 ah chhiar tura ruahman a ni.