Aizawl: State Election Commission chuan Village Council leh Local Council inthlan neih zawh tak chu felfai thaw khatah a ngai.

ZALEN in SEC Secretary Teresy Vanlalhruaii a kawmna ah inthlanna neih zawh tak chu a felfai thaw khatah an ngai tih a sawi a. "Dan leh thupek kenkawh kawngah harsatna a awm lo te, inthlan that ngai a awm lo leh polling booth ah harsatna (booth capturing) te a awm loh avangin a felfai thaw khatah kan ngai a ni," a ti. Covid 19 avangin inbuatsaihna chuan duhthu a sam tawk lo nia an hriat thu sawiin SEC Secretary chuan, "Covid 19 in min tihbuai avangin kan inbuatsaihna in duh thu a sam tawk lo a, ruahmanna kan siam pawh 100% in a fel lo ang tih kan hria a. Covid 19 hian min tibuai lo se chuan tun ai hian inthlanna hi a felfai zawk ngei kan beisei a ni," a ti.

Tun tum inthlan neih zawh taka inthlang ve thei lo Village Council leh Local Council te inthlan hun tur chu a la hriat mai theih loh tih sawiin SEC Secretary Teresy Vanlalhruaii chuan, "District Election Officer te chu nitin Covid 19 dinhmun en turin kan ti a. Health department lam nen inbiakpawh reng a ngai bawk a, DEO ten report an siam dan a zirin inthlan hun tur chu ruat a la ni ang," a ti.

Political party thenkhatin tun tuma vote tla te dah that a, LC leh VC inthlang tur te nen a ruala vote chhiar an rawt chu a remchang lo nia sawiin, "Kan dan (rules) ah vote chhiar hi inthlan zawh veleh neih turin a ti a, chuvangin inthlan zawh ruala vote chhiar nghal hi a ngai a ni," a ti.

Vote thlak chhung a rei chungchangah SEC Secretary chuan, "Polling station ah candidate te hming chuanna 'dummy paper' tar vek turin kan ti a, hei hi mi tam takin an lo en lo nge ni candidate te hming an zawn chhung a rei avangin voting compartment ah an awm rei a. Hmun thenkhatah chuan chawhnu lamah voting compartment hi kan dah belh a, vote thlak pawh a reilo sawtin kan hria a ni," a ti bawk.

State Election Commission hian VC leh LC inthlan chungchangah hian nimin tlai thleng khan lungawilohna complaint an la dawng lo.