ZALEN February 5, 2025 : ZPM Aizawl West-II Block chuan an bialtu MLA, Lalnghinglova Hmar-in a bial chhunga hmasawnna hnathawh tur a puan vanga MNF General Headquarters in an hêkna, State Election Commission in 'Model Code of Conduct bawhchhiatna a ni lo' tia thutlûkna a siam chu lawmawm an ti.

Thuchhuah an siamah ZPM Aizawl West-II chuan an bialtu Lalnghinglova Hmar hian a tlin tirh atangin a bial tan thahnemngai tak leh chak taka ke pênin, bial chhung leh ram pum hmasawn nan theih tâwpin a thawk a. Sawrkar chhung la reilo tak chunga bial tana a hnathawhte leh hmachhawp a neih mêk te hi a chhuanawm an tih thu an tarlang.

ZPM Aizawl West-II chuan, "Tuna Aizawl West-II Bialtu MLA in hmasawnna hnathawh tur a sawifiah pahnih, Tuikual lui kama Cheng Nuai 2,000(20 Crores) sênga kawngpui siam tur leh Cheng Nuai 2,535(25.35 Crores) sênga Vaivakawn Bazar sak that tur te pawh hi bial mipuite'n an engto em em thin, Aizawl West-II mai bâkah Aizawl tlâklam leh Mizoram mipui tan pawh thil lawmawm tak a ni. Heng hnathawh tur te hi 'Model Code of Conduct' puan hma daih, January 7-a Sawrkar in a rêl fel tawh, DIPR Website leh Media dangah pawh tarlan tawh a ni," an ti

"MNF General Hqrs. in State Election Commission a kan Bialtu MLA an hêk hi hriatthiam har kan ti a. Aizawl West hmasâwnna hi MNF General Hqrs. hian min lawmpui lovah kan ngai. Heng hmasâwnna hi Party bil hmasâwnna tur a ni lova, Aizawl leh Mizoram pum hmasâwnna a nih tel avangin party politics khelhna atana lo hmang lo turin kan ngên nghal bawk a ni," an ti bawk.