March 15, 2023; RD minister Lalruatkima'n flagship programme SEDP 2nd installement chu tun March thla chhungin sem hman tum a ni tih sawiin, 2nd phase pawh July thla chhoah sem hman tuma chak taka hmalak mek a ni tih a sawi.

Vawiin a neih MNF, Tuirial East Block, Block Conference, Nisapui Volleyball Court-ah he thu hi sawiin, Lalruatkima Rural Development minister chuan, "MNF party hian chhuan tur dang pakhat mah kan nei lo a, chhuan tur kan neih chu Pathian chiah a ni. He kan zui, kan chhuan Pathian hian Covid 19 hripui karah pawh Israel fate mana leh vahmin a pe ang mai khan ei tur min pe a. Kohhran, tlawmngai pawl leh sorkar thawhhona ṭha malsawmna kan dawng a. Min thlahthlam ngai lo Pathian hian kawng chanveah min kalsan lovang," a ti.

"Congress sorkar laiin Zu zawrh avangin kan rum a, kan thi zawih zawih a. MNF sorkar-in kan titawp nghal a. Assam Police-in Zophaiah silai nen tiang nen, Mizo nula leh tlangval an lo vua a, an kap a, kan ṭap a, kan rum a ni. Chhantu nei lovin kan awm. Pathian leh ram tan titu sorkar-ah ramri-ah buaina a lo awm leh a. Mizoram Police hliam pakhatmah awm lovin Assam Police kan hnawt kiang a ni," a ti a. Zoramah hmasawnna hrang hrang a thleng mek zel a, zirtirtu 3000 chuang kan la a, zirlai pawh an lo ṭhahnem ta. kum 5 chhunga MNF chhawpchhuah hmasawnna hi a tam asin. Sorkar hmasaah kawng a chhe em em a, tunah erawh chuan kan kawng pawh hi a nuam ta hle a ni. Kawngpui ṭha avangin Zoram kar kan pawt tawi nasa hle a ni," a ti bawk.